Ababana n’ubwandu bwa Virusi itera SIDA igihumbi bo mu IIsangabo ry’Abagore "Réseau des Femmes" baba mu turere twa Gasabo na Nyanza bahangayikishijwe no guhabwa akato n’abo bashakanye, imiryango bakomokamo ndetse n’abaturanyi babo.

Abiyemereye ko babana n’ubwandu bwa Virusi itera SIDA, bakabitangira n’ubuhamya, bavuga ko bimwe mu bibazo bahuriyeho ari ukutagira ijambo mu miryango bakomokamo, no kwimwa uburenganzira ku mitungo, guhorana ahaginda ndetse no kutagira ikibatunga.

Bamwe mu batanga ubuhamya mu biganiro bagirana n’Isangano ry’Abagore baharanira iterambere ry’icyaro (Réseau des Femmes) hirya no hino mu gihugu, bavuga ko bafite ikibazo cyo guhora bigunze, kutigirira ikizere cy’ejo hazaza kuburyo bamwe biyise akazina ka "Turi muri bus iri mu rugendo" bishatse kuvuga ko nta kindi bategereje usibye urupfu.

Umuhuzabikorwa w’Isangano ry’Abagore baharanira iterambere ry’icyaro Busasa Beatha, avuga ko iyi miryango ibana n’ubwandu bwa Virusi itera SIDA bakeneye gukorerwa ubuvugizi ku miryango inyuranye no kudahabwa akato ndetse no guhabwa inkunga zo mu buryo buhoraho, ngo kuko abenshi bemera kwigaragaza no gutanga ubuhamya ko banduye usanga nta mikoro ahagije bafite.

Agira ati "Ababana n’ubwandu bakeneye abajyanama mu by’ubuzima kugirango babafashe kwigirira ikizere mu bihe bizaza".

Ababana n'ubwandu bigishwa uko bakomeza kwigirira icyizere

Busasa Beatha

avuga ko bakwiriye kugira uburenganzira ku mutungo nk’abandi bose imiryango ibana nabo ikareka kubaheza. Yongeraho ko bagaragaje ibibazo bakunze guhura nabyo byarushaho kubishakira umuti.