Imishinga itatu ya mbere myiza kurusha iyindi y’ibitekerezo byakorwamo film (script) ivuga ku bwiyunge bw’Abanyarwanda, yahembwe ibihumbi 22 by’amadolari, ni ukuvuga abarirwa muri miliyoni 14 y’amanyarwanda, azakoreshwa mu gushyira mu bikorwa ikinwa ry’izo filimi nyarwanda.
Umuhango wo guhemba ba nyir’ibitekerezo bitatu bya mbere muri 42 by’abari bitabiriye iri rushanwa, warabereye kuri “New Papyrus” ku kimihururura, kuri uyu wa kabiri tariki ya 25 Kamena 2013, mu gikorwa cyateguwe na “Goethe-Institute”, umushinga w’Abadage ukora ibikorwa bijyanye no guteza imbere ubugeni n’ubuhanzi bushingiye ku muco ku Isi, mu ishami ryayo ryo mu Rwanda.
Ni mu gice cya mbere cy’igikorwa kiswe “Film Script Competition 2013”, aho abarushanwa bagombaga kwandika igitekerezo kivuga ku nsanganyamatsiko yari mu rurimi rw’icyongereza, igira iti: “Rethinking Reconciliation” bisobanuye “kongera gutekereza ubwiyunge”, aho ikigenderewe ari uguteza imbere ubwiyunge no kubaka ubufatanye mu Banyarwanda, nk’uko Dr Peter Stepan, umuyobozi wa Goethe-Institute mu Rwanda abivuga.
Dr Stepan agira ati “Insanganyamatsiko y’uyu mwaka yari kongera gutekereza ku bumwe, abarushanyijwe batanze ibitekerezo byiza, bitatu byonyine nibyo byabashije gutsinda. Umwaka ushize insanganyamatsiko yavugaga ku ihohoterwa rishingiye ku gitsina n’iryo mu ngo. Uyu mwaka rero twavugaga ubumwe, kandi tuzakomeza gutegura iki gikorwa buri mwaka.”
Mu batsinze iri rushanwa ku mwanya wa mbere haje Yves Montand Niyongabo n’igitekerezo cye yise “The Invincible” bivuga “Utaneshwa”, wegukanye igihembo cya mbere cy’amadolari 8.500 ni ukuvuga miliyoni zibarirwa muri eshanu na 500 z’amafaranga y’u Rwanda.
Umwanya wa Kabiri wajeho Samuel Ishimwe, wegukanye amadolari 7.000, ni ukuvuga abarirwa muri miliyoni enye n’igice y’u Rwada, ku bw’igitekerezo yise “Crossing Lines”. Naho umwanya wa gatatu wegukanwa na Philbert Aimé Mbabazi, ku bw’igitekerezo “Hutsi”, akaba yabashije gutwara ibihumbi 6.500 abarirwa muri miliyoni enye na 200 z’amafaranga y’u Rwanda.
Abatsinze aya marushanwa bishimiye ko inzozi zabo zigiye kuba impamo
Aba basore batatu, bose b’Abanyarwanda bari mu kigero cy’imyaka iri munsi ya 30, wabonaga bagaragaza ibyishimo ku bw’ibihembo imishinga yabo yegukanye, no kuba babashije guhiga ibindi bitekerezo 39 byose byari bihanganye n’ibyabo.
Samuel Ishimwe, umusore w’imyaka 21, usanzwe akunda akanakora umwuga wa Sinema, yegukanye umwanya wa kabiri muri aya marushanwa ku bw’igitekerezo cye kizakorwamo film yise “Invincible”, arishimira iyi ntambwe y’ibanze ateye muri sinema agira mu magambo make cyane ati “Byantunguye kandi byanshimishije cyane, bintera n’imbaraga zo gukomeza umwuga wa sinema.”
Mu muhango wo gutanga ibihembo, umuhanzi akaba n’intumwa mpuzamahanga y’u Rwanda ku bwiyunge, Jean Paul Samputu, kimwe n’uwari uhagarariye Ambasaderi w’u Budage mu Rwanda, Wolfgang Wiesner, nibo bashyikirije ibihembo abatsinze.
Aba batsindiye ibihembo bahawe amezi icyenda kuva bagishyikirizwa ibihembo, yo gukora film ngufi z’iminota 15 zivuga ku bwiyunge. Aha byemewe kuba umuntu yazakora film iri mu rwego rw’igitekerezo(fiction) cyangwa ishingiye ku kuri kuriho gufatika (documentary).
Izi film nizirangira zikazerekanwa muri “Film Gala” izaba ku wa 28 Werurwe 2014, ndetse zikazanakoreshwa mu bihe byo kwibuka Jenoside yakorewe Abatutsi ku nshuro ya 20.
Iki gikorwa kizashyirwa mu ngiro ku bufatanye bwa Goethe-Institut, DeutscheGesellschaftfürInternationaleZusammenarbeit (GIZ), PLAN RWANDA, Partnership Rhineland-Palatinate (Jumellaje Rennanie Paratinat), KfW German Development Bank, hamwe na International Alert. Byose bigahuzwa na Ambasaderi w’u Budage mu Rwanda.
Uko irushanwa ryari riteye
Hari hasabwe ko Abanyarwanda biyumvamo ubushobozi n’ubushake bari mu mwuga wo gukora Sinema, bakwandika igitekerezo cya film ivuga ku bwiyunge, maze ikazahatana n’izindi. Ibitekerezo 42 nibyo byari byabashije gutangwa kugeza tariki ya 15 Gicurasi wari umunsi ntarengwa maze bishyikirizwa inararibonye mu mwuga wa Sinema ziturutse mu bihugu bitandukanye by’isi ngo bitoranyemo imishinga irusha iyindi ubwiza maze abe ariyo izahembwa.
Inararibonye zanononsoye ibi bitekerezo, harimo;
Ulla RAPP waturutse mu Budage, akaba asanzwe ari umwanditsi n’umukosozi w’inyandiko z’amafilmi, ndetse akaba yaranagize uruhare rutandukanye mu ikorwa rya za filimi z’Abanyamerika, ndetse akaba yaranafatanyije na bamwe mu bayobozi b’amafilimi bo muri Amerika bazwi cyane kugeza ubu.
Fu QIONG, waturutse mu Bushinwa, usanzwe akorera televiziyo y’igihugu mu Bushinwa, ndetse akaba yaranigeze kwegukana igihembo nk’umuntu ukora filimi nziza za (Documentary/Documentaire)
Kivu RUHORAHOZA, Umunyarwanda umaze kumenyekanaho kwandika no gukora filimi, akaba yarananditse film “Greymatter“. Yegukanye igihembo mu Bufaransa.
Martin BRANDES, Umudage waturutse mu Rwanda, akaba afite inararibonye w’imyaka 30 mu mwuga wa Sinema, aho nyuma yo kuba mu Bushinwa imyaka 11 nk’umujyanama mu by’itangazamakuru, ubu ari umujyanama akanayobora ikigo cyigisha ibya Sinema n’itangazamakuru mu Rwanda (Kwetu Film Institute).
TANGA IGITEKEREZO