Amajyepfo: Hari gusozwa urutonde rw’abakekwaho gusambanya abangavu n’abacuruza ibiyobyabwenge

Yanditswe na Prudence Kwizera
Kuya 20 Ukwakira 2019 saa 04:41
Yasuwe :
0 0

Urugaga rw’Urubyiruko rushamikiye ku Muryango FPF Inkotanyi, mu Ntara y’Amajyepfo, ruri gusoza urutonde rw’abagabo n’abasore bakekwaho gusambanya abangavu n’abakekwaho gucuruza ibiyobyabwenge kugira ngo bagirwe inama yo kubireka.

Ni igikorwa bakoze mu kwezi kwahariwe ibikorwa by’urubyiruko kwatangije tariki ya 07 Nzeri gusozwa kuri uyu wa Gatandatu ku ya 19 Ukwakira 2019.

Perezida w’Urugaga rw’Urubyiruko rushamikiye ku Muryango FPR Inkotanyi mu Ntara y’Amajyepfo, Nsanzinka Prosper, yavuze muri uko kwezi bibanze ku guhangana n’ibangamiye abaturage.

Ati “Twakoze ibikorwa by’ubukangurambaga ku gukumira inda ziterwa abangavu no gukumira ibiyobyabwenge. Turi gusoza urutonde rw’abagabo n’abasore bakekwaho ibyaha byo gusambanya abangavu n’urw’abakekwaho gucuruza ibiyobyabwenge.”

Yavuze ko mu gukora urwo rutonde bagandeye ku makuru yagiye atangwa n’urubyiruko rw’abakorerabushake, Inama y’Igihugu y’Urubyiruko n’ abaturage mu midugududu.

Ati “Hari ibyo twabaga tuzi ariko hari n’abaturage bazaga bakatwihera amakuru ariko byavuye mu rubyiruko nyirizina.”

Nsanzinka avuga ko urwo rutonde nirumara kurangira hazakurikiraho kwegera abatunzwe agatoki no kubaganiriza babagira inama yo kureka izo ngeso mbi.

Ati “Gahunda yo kubaganiriza iri muri uku Kwezi kw’Ugushyingo tugiye gutangira; twari tukiri kwegeranya imibare ngo tumenye ngo ni uyu atuye aha arekekwaho iki; tukajya kumuganiriza tuti ‘nyaboneka twamenye ko ibi bintu bikorwa kandi tugufiteho amakuru ntitubizi neza, ukwiye guhinduka cyangwa niba utabikora ukadufasha guhindura abandi.”

Yavuze kandi ko urwo rutonde nirumara kurangira bazarushyikiriza Urwego rw’Igihugu rw’Ubugenzacyaha, RIB, kugira ngo narwo ruzarwifashije mu guhashya abatera inda abangavu n’abacuruza ibiyobyabwenge.

Ikibazo cy’abangavu batwita imburagihe kiri mu bihangayikishije kuko imibare ya Minisiteri y’Ubuzima igaragaza ko hagati ya Mutarama na Kanama 2019, abangavu barenga 15,600 batewe inda imburagihe.

Naho ku bijyanye n’ibiyobyabwenge, Ikigo cy’Igihugu cy’Ubuzima, RBC, giherutse gutangaza ko Abanyarwanda barenga ibihumbi 200 biganjemo urubyiruko batewe uburwayi bwo mu mutwe no gufata ibiyobyabwenge.

Aha urubyiruko ruri mu bikorwa bitandukanye bigamije guteza imbere imibereho myiza y'abaturage
Perezida w’urugaga rw’abagore rushamikiye ku Muryango FPR Inkotanyi mu Ntara y'Amajyepfo, Mafurebo Kayitesi Anita
Perezida w’Urugaga rw’Urubyiruko rushamikiye ku Muryango FPR Inkotanyi mu Ntara y’Amajyepfo, Nsanzinka Prosper, yavuze muri uko kwezi bibanze ku guhangana n’ibangamiye abaturage

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza