Abagore bahembwe muri ibyo birori byabereye iwe mu rugo, ni abavuye mu rutonde rwatanzwe n’abakurukira Paji ya Facebook ya Ambasade ya Amerika barenga 20 000.

Amb. Bark-Ruggles n'abagore b'abanyamurava bahembwe

Amb. Barks-Ruggles yabwiye abari bitabiriye ibyo birori ati ”Umurava, ubwitonzi no kwiha intego kwaba bagore bane bigaragaza urwego rw’iterambere u Rwanda rushaka kugera ho.”

Barks-Ruggles yakomeje avuga ko yishimiye kuzakorana nabo mu gihe cy’imyaka itatu azamara mu Rwanda, kandi bakazaboneraho kurushaho gushaka ibyateza imbere abagore n’abakobwa, kugira ngo buri mukobwa abashe gutegura ejo heza no gukoresha impano ze ategura ejo heza h’u Rwanda.

Abahawe ibihembo ni Chantal Ingabire uyobore itsinda ry’abunganizi mu mategeko 22 banafasha abana bakorewe ihohoterwa rishingiye ku gitsina na Jeanne Mwiriliza washinze ishyirahamwe Tubahumurize rifasha abagore bahuye n’ihohoterwa.

Abandi ni Liberatha Mukasine wabashije kuba umuhinzi ukomeye w’imyumbati nyuma yo kubura umugabo we n’abana batatu muri Jenoside yakorewe Abatutsi mu 1994, na Xaverine Mukamunana washinze ishyirahamwe Jyamubandimwana rifasha abana bafite ubumuga.

Leta Zunze Ubumwe za Amerika zatangiye guhemba abagore b’abanyamurava mu 2007.

Uyu mwaka ibihembo byatanzwe bikaba ari iby’umwihariko ku bagore b’abanyarwanda bagaragaje imikorere n’imiyoborere myiza.