Ibi yabigarutseho ubwo yatangizaga gahunda yo gutoza abana n’urubyiruko ruba mu mahanga umuco w’u Rwanda hagamijwe gufasha abana b’u Rwanda bavukiye mu mahanga.

Iki gikorwa kimaze igihe gikorwa mu bihugu bitandukanye Abanyarwanda batuyemo kibaye ku nshuro ya mbere mu Rwanda aho cyitabiriwe n’abana 138 baturutse mu bihugu birimo u Bwongereza, u Busuwisi n’u Bubiligi.

Abitabiriye bari mu byiciro by’imyaka bitandukanye kuko umuto afite imyaka irindwi mu gihe umukuru afite imyaka 26. Uyu mwiherero wabo uzamara iminsi itanu kuva ku wa 25-29 Nyakanga 2023.

Prof. Nshuti Manasseh yasabye aba bana kuzakurana indangagaciro nyarwanda no gukunda igihugu cy’u Rwanda kuko ariwo musingi wa byose.

Ati “Umuco wacu niyo nkingi y’ubuzima, iyo mvuze umuco uba ari umwe, aho waba uri ntacyadutandukanya n’ubunyarwanda, ikiduhuza kiruta icyadutandukanya. Mukomere ku muco wacu kuko nicyo kintu kituranga, kikatugira abo turibo kandi ntimukajye muhishira uwo muco wacu.”

Yasangije uru rubyiruko ko nawe yabaye mu bihugu by’amahanga nk’u Bwongereza ariko yamaze kumenya neza ko ubunyarwanda budashobora kuva mu muntu aho yaba ari hose.

Ati “Byinshi ubona hariya ni byiza, bikwiye kuba byiza by’u Rwanda buri kimwe kiza ubonye ukizane iwanyu kuko iyo ugiye guhaha niko ubigenza.”

Yasabye ababyeyi gukomeza kugira uruhare mu gukundisha abana no kubigisha umuco w’Abanyarwanda kuko ukwiye kuranga buri Munyarwanda.

Ati “Dukomere ku bunyarwanda kandi tubwishimire, aho tugeze ni heza mu kubaka igihugu cyacu. Turavuga ngo igihugu ni nk’umubyeyi, uko yaba ari kose ntabwo umuvuga nabi, nta muntu uvuga nabi igihugu cye rero kuko ni umubyeyi mukuru. Ni ukukirwanirira, hanyuma abashobora kuba baracyanze baba biyanga. Kwanga u Rwanda ni ukwiyanga kuko ntiwabona ahandi hameze nk’iwanyu.”

Biteganyijwe aba bana n’urubyiruko bitabiriye iki gikorwa bazamara icyumweru bigishwa ibintu bitandukanye bigize umuco nyarwanda harimo guhamiriza, kubyina n’Ururimi rw’Ikinyarwanda.

Uretse kwigishwa kubyina n’Itorero ry’Igihugu, Urukerereza, bazanasura Ingoro ndagamateka iherereye i Nyanza mu Rukari ndetse n’Ingoro y’Urugamba rwo guhagarika Jenoside, basobanurirwe amateka y’u Rwanda.

Ababyeyi batandukanye baherekeje abana babo bashimangiye ko iyi gahunda bayitangije mu rwego rwo kwigisha abana igihugu cy’u Rwanda kuko benshi batazi umuco w’u Rwanda nk’uko Muteteri Chantal utuye mu Bubiligi yabigarutseho.

Ati “Twishimiye uko twakiriwe. Nubwo twabyariye muri ayo mahanga, twifuza ko abana bacu bamenya umuco wacu kuko ni uwa agaciro kandi ni mwiza. Twatagiye tubatoza mu rugo ariko ubu nk’Itetero tugize abana 50 kandi ubona ko babyishimiye.”

Nabakobwa Marie Jeanne yashimangiye ko iyi gahunda yo kwigisha abana no kwiyumvamo u Rwanda bayimaranye imyaka 35 kandi ifasha abakiri bato kumenya byinshi ku gihugu ababyeyi babo bakomokamo n’umuco wacyo.

Uru rubyiruko rwiganjemo abageze mu Rwanda ku nshuro ya mbere narwo rwishimiye kuhagera ndetse runagaragaza ko ruzunguka byinshi muri iki gihe rugiye kumara mu Rwanda birimo no kwiga ururimi rw’Ikinyarwanda.

Minisiteri y’Ububanyi n’Amahanga yagaragaje ko izakomeza gushyigikira iyi gahunda igahoraho mu rwego rwo gukomeza kumenyekanisha umuco w’u Rwanda mu bana bavukiye mu mahanga.

Amafoto: Munyakuri Prince na Claude Kasiro