Abanyarwanda bo mu madini n’amatorero atandukanye, abakomeye n’aboroheje, uko iminsi ihita indi igataha niko bagenda barushaho kugaragaza inyota yo gusenga Imana.

Uburyo bayisengamo ndetse n’aho bayisengera haratandukanye kandi hamwe muri ho hateye impungenge kuko hari abahasiga ubuzima.

Mu misozi ihanamye, mu mazi asuma, mu buvumo niho basigaye bajya gushakira Imana....

Ni ahantu bashobora guhurira n’akaga, ariko kandi bavuga ko haba Imana, ndetse ngo ibyifuzo cyangwa ibibazo bagiye bafite bagarukana ibisubizo byabyo.Twaganiriye n’abo mu madini atandukanye bavuga ko basengera ahantu hatandukanye.

Dukuzumuremyi Jonas yifuje ko idini asengeramo ryagirwa ibanga .Yagize ati “Iyo nagiye gusengera mu mazi y’i Gicumbi, ntahana ibisubizo by’ibibazo najyanye. Hari ahantu haba Imana yumva amasengesho.”

Ibi kandi bishimangirwa na Nyirabarigura Devota, umukristo wo mu itorero rya ADEPR Gatsata uvuga ko iyo yasengeye mu buvumo Imana imwumva.

Yagize ati “Iyo nagiye mu buvumo bw’i Karama (mu karere ka Nyarugenge) mba nziko Imana iri bwumve amasengesho yanjye nta kabuza.”

Imana bajya kuyishakira mu misozi ....ntaho itaba

Pasiteri Habyarimana Desiré, wo mu Itorero rya ADEPR mu karere ka Kicukiro, mu kiganiro yagiranye na IGIHE yagize ati “ Gusengera Kanyarira, kizabonwa na Bangukangutabare no kujya ahantu mu cyumba runaka, ntibifite icyo bivuze, ahubwo umutima umuntu asengana ni wo ufite icyo uvuze, upfa kuba gusa ufite umutima wo gusabana n’Imana. Imana nta musozi n’umwe ibaho, iba mu mutima w’umuntu utunganye.”

Yakomereje ku ijambo riri mu ivanjiri ya yohana 4:23 havuga ko igihe kije kandi gisohoye, abasenga Imana bakwiye kuyisengera mu mwuka no mu kuri.

Ati “Wasengera mu nzira urimo kugenda, mu ishuri , mu bitaro urwaye[...]Imana ireba umutima umuntu yasenganye, ntireba aho wasengeye n’umwifato wari ufite.”

Bishop Nzeyimana Innocent umuyobozi w’itorero ’Nayoth Church’, yatangarije IGIHE ko igihe cyose umuntu asenga adafite umugayo ku Mana imwumva.

Yagize ati “Haba mu nzu yawe, haba ku musozi, haba mu muhanda[...]ahantu hose usengeye ubishyizeho umutima Imana irakumva.”

Akomeza avuga ko ntawacira urubanza umuntu ujya gusengera ku musozi cyangwa mu mazi, dore ko ngo aho umuntu yizeye ko Imana iri bumusubizirize imusubiza.

Ubuvumo buri ku musozi wa mont kigali

Bizeye neza ko Imana ibumvira

Umukecuru arakukuza ajya gusengera ku musozi

Indi nkuru wasoma :Umusozi wa “Kanyarira” wurirwa n’amagana ashaka ibitangaza by’Imana atabona ahandihttp://www.igihe.com/amakuru/u-rwan...