00:00:00 IGIHE NETWORK KN KINYARWANDA EN ENGLISH FR FRANCAIS

Batangiye kurya ku mbuto! Imfura za Rwanda Coding Academy zasoje amasomo mu mihigo

Yanditswe na Claude Bazatsinda
Kuya 8 August 2022 saa 07:52
Yasuwe :

Abanyeshuri 58 ba mbere basoje amasomo yabo y’ikoranabuhanga bari bamaze imyaka itatu bigira mu Ishuri rya Rwanda Coding Academy, riherereye mu Karere ka Nyabihu mu Murenge wa Mukamira, bashimirwa uruhare bagira mu guteza imbere ikoranabuhanga mu bigo bikomeye birimo n’urubuga Irembo.

Abo banyeshuri basoje amasomo yabo abenshi muri bo batangiye gusoroma ku mbuto z’amasomo bigishijwe kuko hari abafite ibigo by’ikoranabuhanga bashinze, abandi bakora mu bigo by’ikoranabuhanga birimo n’urubuga Irembo n’ibindi bigamije guhindura ubuzima bw’abaturage binyuze mu ikoranabuhanga.

Niyonzima Stecy afite umushinga wo gukora igare rizafasha abafite ubumuga bw’ingingo kugenda bidasabye ko babasunika ahubwo bakigenza.

Ati “Mfite umushinga wo gufasha abafite ubumuga bw’ingingo kuba bakoresha igare ariko aho gusunikwa rigahabwa porogaramu izaba ikoresha ijwi gusa nta mbaraga bitwaye”.

Verité Mugabo Makuza yakoze ‘Cobra’ ikaba ari ‘software’ ituma abantu bakora porogaramu kandi ubu abantu barenga 1000 barayikoresha nubwo biganjemo abanyamahanga kuko usanga mu Rwanda batarabyitabira cyane.

Cyebukayire Peace yakoze ikoranabuhanga rituma abahinzi bamenya amakuru y’ibihingwa byabo n’igishobora kubyangiza, bityo bakaba bafata ingamba mbere bataragwa mu bihombo.

Ati “Bizafasha abahinzi kuba batazakomeza kugwa mu bihombo bahuraga nabyo, bongere umusaruro twihaze mu biribwa dusagurire n’amasoko bibe umwuga utunze ba nyirawo n’igihugu."

Minisitiri w’ikoranabuhanga na Inovasiyo, Ingabire Musoni Paula, yashimye abanyeshuri barangije amasomo uruhare bagira mu gufasha ibigo by’ikoranabuhanga n’abafatanyabikorwa ba Rwanda Coding Academy, yizeza abarangije amasomo yabo ko bagiye kwitabwaho bagategurwa kugira ngo harebwe uko bakomeza kuminuza.

Yagize ati"Tugiye kubategurira gahunda y’imenyerezamyuga mu gihe cy’amezi atandatu noneho nyuma yaho bazafashwa mu gukomeza no kwiga kaminuza bakomeze bongere ubumenyi ari nako barushaho gutanga umusanzu wabo mu ikoranabuhanga. Tuzakomeza no kubafasha kugirana imikoranire na Irembo mu gukomeza kongera serivisi za Leta itanga."

Bamwe mu babyeyi bafite abana barangije amasomo yabo muri Rwanda Coding Academy, bemeza ko ubumenyi abana babo bahawe bwari bukenewe kuko batangiye kububyaza umusaruro kandi bukaba bubatunze.

Umubyeyi witwa Nzamwita Venuste yavuze ko abana bajya kwiga muri ririya shuri nta cyizere bari bafite ariko ubu bafite ubumenyi buhambaye mu ikoranabuhanga kuko bajya bifashishwa mu biraka bitandukanye nko mu Irembo n’ahandi.

Ati “Urebye n’ibyo bakoreye ku ishuri usanga ari imishinga izafasha igihugu n’abaturage, turanezerewe cyane kuba natwe tubonye abahanga kandi biteguye gufasha Leta. Turabasaba ko ubumenyi bahawe bazakomeza kubwongera bagafasha igihugu aho kubujyana kure mu mahanga ngo ni uko bahemba menshi”.

Umuyobozi Mukuru wa Irembo, Israël Bimpe, avuga ko kuri ubu abo banyeshuri barangije amasomo yabo bagiye kubafasha kuzamura mu bwiza bujyanye n’igihe no kongera serivisi zitangirwa ku Irembo zikava ku 140 zitangwa zikagera kuri 800 nk’uko biri muri gahunda ya Leta kandi n’ubundi bari bamaze igihe bifashishwa mu by’ikoranabuhanga.

Minisiteri y’ikoranabuhanga na inovasiyo, ivuga ko muri uyu mwaka w’amashuri 2022-2023 i Muhanga mu Majyepfo hazatangizwa ishuri riri ku rwego rw’iri mu gihe muri buri ntara biteganyijwe ko hazagenda hashyirwa Rwanda Coding Academy.

Rwanda Coding Academy ni rimwe mu mashuri yihariye rihuza porogaramu y’uburezi rusange na tekiniki n’ubumenyingiro. Ryafunguye imiryango mu 2019 mu Karere ka Nyabihu, mu Ntara y’Iburengerazuba.

Ikigamijwe ni uguha abarangije icyiciro rusange ubumenyi buhagije mu gukora porogaramu za mudasobwa kugira ngo abanyamahanga bigaruriye isoko ry’u Rwanda mu gukora izo porogaramu bagende bagabanywa.

Ni ishuri rifite porogaramu y’imyaka itatu. Gahunda y’amasomo irimo ibijyanye no gukora porogaramu za mudasobwa (software engineering), ubwirinzi kuri internet (Cyber security) na porogaramu zishyirwa mu bikoresho birimo ibizamura abantu mu nyubako ndende (embedded system).

Bamwe muri aba banyeshuri bafite akanyamuneza ko kuba barashinze ibigo byabo abandi bakaba bafite imishinga ikomeye y'ikoranabuhanga
Ababyeyi basabye abarangije amasomo gushyira imbere gukorera igihugu
Minisitiri w'ikoranabuhanga na Inovasiyo, Ingabire Musoni Paula, yijeje ko aba banyeshuri bazakomeza kwiga Kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .