Ikibazo kiragira kiti “Iyo umuntu agize ibyago bikomoka ku kazi akavurwa agakira, ndetse agashobora no gusubira ku kazi, ariko akazagira ingaruka ziturutse kuri ya mpanuka akareka umurimo yakoraga, icyo gihe RSSB imugoboka gute?”

Nk’ibisanzwe igisubizo kiratangwa na Nsabimana James, Umuyobozi ushinzwe ibyago bikomoka ku kazi muri RSSB.

Yagize ati “Umuntu agize impanuka, Muganga agateganya igihe ashobora gukirira, ndetse nawe akisubirira ku kazi. Ariko hashira igihe, nyuma y’umwaka nk’umwe akamugara kubera ingaruka za ya mpanuka akazi kakamunanira.

Icyo gihe ashobora gusubira kwa Muganga, bakongera bakamusuzuma, noneho bakagena igipimo cy’ubumuga bwe bakurikije uko bwiyongereye, bityo Ikigo cy’Ubwiteganyirize nacyo kikamugoboka.”

Nsabimana James, umuyobozi ushinzwe ibyago bikomoka ku kazi muri RSSB

Yakomeje agira ati “Ibyo birateganije rwose, ku basanganywe ibipimo by’ubumuga. Ahubwo ndetse usibye n’uriya wumvise ubushobozi bwe ku kazi butangiye kuba buke, n’undi wese ashobora ku bwende bwe kongera kujya kwisuzumisha kwa muganga kugira ngo agenzure ubumuga bwe.”

Nsabimana James avuga ko bishoboka ko n’Ikigo cy’Ubwiteganyirize gishobora kubisaba umuntu uyu n’uyu igihe bibaye ngombwa, ariko nyuma y’imyaka itanu ikurikira itariki yakiriyeho, nta suzuma rishobora kubaho bisabwe n’ Ikigo cy’Ubwiteganyirize mu Rwanda u bwa cyo.

Ikindi kandi iyo habaye impaka ku kigereranyo cy’ubumuga budatezuka, nyir’ubwite ashobora gushyikiriza ikibazo cye Akanama karenganura gateganijwe mu mategeko agenga ubwiteganyirize nako kakifashisha Akanama k’Abaganga gashyirwaho na Minisitiri ushinwe Ubuzima kagacyemura impaka.

[email protected]