Uwahoze ari Perezida wa Burkina Faso ategerejwe muri Cote d’Ivoire aho yari yabanje guhungira nyuma yo guhirikwa ku butegetsi mu Kwakira akahava ajya muri Maroc.

Perezidansi ya Cote d’Ivoire yatangaje ko Compaore agiye kugaruka muri icyo gihugu avuye muri Maroc kuko n’ubundi yari yagiye ababwiye ko ashobora kugaruka mu gihe kitazwi, nk’uko ikinyamakuru Oeil d’Afrique kibitangaza.

Compaore yamaze ibyumweru birenga bitatu mu murwa mukuru wa Yamoussoukro acumbikiwe mu nzu ihenze ahava ku ya 21 Ugushyingo ajya muri Maroc.

Minisiteri y’Ububanyi n’Amahanga ya Maroc yavuze ko yahageze aherekejwe n’abandi batanu kandi ko azahamara igihe kitazwi.

Ku ya 28 Ugushyingo Minisitiri w’intebe wa Burkina Faso, Lt Col. Isaac Zida yatangaje ko bazasaba Maroc ikamuha Leta ayoboye akaburanishwa igihe hagize umurega.

Sosiyete sivile ya Burkina Faso isaba ko Compaore yakurikiranwa n’inkiko ku byaha yaba yarakoze mu myaka 27 yamaze ku butegetse, birimo n’urupfu rw’uwo yahiritse ku butegetsi, Thomas Sankara.

Mu biregwa Compaore harimo n’urupfu rw’umunyamakuru Norbert Zongo wishwe mu 1998 na abagenzi be 3 akora iperereza ku rupfu rw’umushoferi w’umuvandimwe wa Blaise Compaore, Francois Compaore.