Mu rwego rwo guteza imbere umwuga wo kwandika mu Rwanda, imwe mu nzu ikora isakazabitabo hano mu mujyi wa Kigali, Bloo Books yagiranye amasezerano yo gucururiza ibitabo abanditsi bane bakizamuka .

Abo banditsi bane , Murisa Jean Maurice, Serge Uwimana, Josée Uwizeyimana na Rica Rwigamba bahawe amahirwe yo gucururizwa ibitabo Bloo Books mu rwego rwo kubazamura bakagera ku rundi rwego.

Murisa Jean Maurice

Murisa Jean Maurice ni umwanditsi wavutse mu 1986, yize indimi n’ubuvanganzo mu ishuri ryisumbuye rya ESA Gikondo ubu isigaye yitwa St Philip Technical Secondary School riherereye mu karere ka kicukiro .

Yakomeje amashuri yisumbuye mu ishami ry’ivugururamibereho n’ubuyobozi (social work and social administration) mu ishuri rikuru rya Mutagatifu Lawrence riherereye mu gihugu cya Uganda.

Murisa avuga ko yatangiye umwuga wo kwandika yiga mu mwaka wa gatanu w’amashuri yisumbuye.

Kuri ubu, Murisa amaze kwandika ibitabo byinshi ariko ubu ikimaze kujya ahagaragara ni icyitwa “Urukundo Ntirugurwa ifaranga” cyatangajwe bwa mbere muri 2012.

Murisa agiye kumurika ibitabo bye bibiri : “Ikinyaburiri “na “Ubucuti bw’Inka n’Ingagi.”

Serge Uwimana

Uwimana Serge uzwi ku izina rya Sir’g Serge. Ni umwanditsi w’inkuru by’umwihariko , asanzwe yandika ku giti cye abinyujije mu buryo bwa “blog”.

Yatangiye kwandika cyera ariko kubera Isakazabitabo ritari ryakageze ku rwego rushimishije ahitamo gutangira iyo “blog” yitwa http://sirgserge.wordpress.com muri 2013.

Akunze kwandika inkuru ku buzima busanzwe bwa buri munsi cyane cyane kuri Kigali, ari nawo murwa atuyemo. Kuri ubu amaze kwandika inkuru ebyiri zagenewe abana zitwa: Ganza na Hirwa n’indi yitwa Ubucuti bw’ingona n’Imvubu.

Marie Josée Uwizeyimana

Marie Josée Uwizeyimana warangije amashuri ye yisumbuye muri 2009 kuri Groupe Scolaire APAGIE/ MUSHA muri Mibare , Ubutabire n’Ubunyabuzima (Mathematics-Chemistry-Biology).

Amashuri makuru yayakomereje muri Universite des Grands Lacs i Bujumbura muri 2011 mu bijyanye na Pschologie Clinique ariko ntiyayarangiza kubera impamvu ze bwite.

Ubuzima bwe nk’umwanditsi yabutangiye mu 2006, yandika indirimbo z’Imana. Umwaka wa 2007 yaje gutsinda amarushanwa yo kwandika inkuru ndende yari yateguwe mu gihugu na Ihuriro IBARWA.

Nyuma yaho amaze gutsinda amarushanwa ya Senario d’ Afrique, nibwo yatangiye gukunda kwandika cyane .

Amaze kwandika inkuru zitandukanye, ariko kuri ubu afite ebyiri zirimo zitunganyirizwa muri Bloo Books arizo: “Igikomangoma Gito n’indi yitwa Imparage n’Ingona.”

Rica Rwigamba

Rica Rwigamba ni Umubyeyi wubatse ufite abana batatu. Mu buzima busanzwe, akunda kuganiriza abana ababariar inkuru. Iyo muganiriye akubwira ko abafana be ba mbere ari abana be.
Yemeza ko abana hari byinshi bigira mu nkuru basomerwa cyangwa babwirwa.

Rwigamba avuga ko yatangiye kwandika akiri umwana ariko akabigendamo biguru ntege.

Kuri ubu yihaye intego yo kuzuza ibyifuzo bye bya kera byo kuba umwanditsi, yamaze no gutangiza “blog” yitwa http://wifuziki.wordpress.com.

Ubu nawe afite inkuru irimo gutunganyirizwa muri Bloo Books yitwa “Agapusi k’Inyaryenge”.

Yayanditse afatanyije na Fiston Mudacumura wamenyekanye kuri TV10 ku kazina ka “Tonton Fiston” mu kiganiro cy’abana cyitwa Kids Club.