Banki y’u Rwanda itsura amajyambere (BRD) yibutse abahoze ari abakozi ba BRD na Caisse Hypothecaire Du Rwanda hamwe n’abakiriya b’izo banki zombi bose bagera kuri 37 bazize Jenoside yakorewe Abatutsi mu 1994.

Igikorwa cyo kubibuka cyabaye kuri uyu wa 2 Gicurasi 2014, gitangirwa n’urugendo rwo kwibuka, rwavuye ku cyicaro cya BRD mu mujyi wa Kigali rusorezwa ku Rwibutso rwa Jenoside yakorewe Abatutsi rwa Kigali ku Gisozi.

Bageze ku Gisozi, hashyizwe indabo ku mva hanunamirwa imibiri y’Abatutsi basaga ibihumbi 250 bahashyinguye.

Nyuma ibikorwa byakomereje ku cyicaro cya BRD ahatangiwe ubutumwa butandukanye bujyanye no kwibuka abahoze ari abakozi b’iyi banki ndetse no kurebera hamwe uko Jenoside yateguwe kugira ngo ibyabaye bitazasubira.

Umuyobozi mukuru wa BRD, Kanyankore Alex, aganira n’itangazamakuru nyuma yo gusura urwibutso, yavuze ko iki gikorwa kijyanye no kwibuka Abatutsi bose bishwe muri Jenoside; ariko kandi by’umwihariko hanazirikanwa ku bahozi ari abakozi ba BRD n’ab’icyahoze ari Caisse Hypothecaire Du Rwanda.

Yagarutse ku kuba BRD ikomeza gufata mu mugongo imiryango y’abari abakozi bayo, aho ibafasha mu buryo butandukanye, burimo kurihira amashuri abana, gufasha abapfakazi kandi banki inizeza ko izakomeza kubaba hafi.

Mukamana Mayimuna, uhagarariye imiryango y’abahoze ari abakozi ba BRD bishwe muri Jenoside, yavuze ko ntako BRD itagira ngo ibiteho anizera ko n’ibyo itarakora izabikora.

Yagize ati “BRD ituba hafi, abana bari bafite abyeyi bishwe barafashwa natwe b’abapfakazi ituba hafi, baradusura, twishimira uburyo batwakira n’uburyo batwereka ko batwishimiye. Ni impamo baragerageza kandi rwose ibyo ari byo byose n’ibyo batarakora bazabishobora.”

Mukamana yishimira ko mu myaka 20 ishize abarokotse Jenoside nabo bamaze kwiyubaka, ati “Urugero nk’ababyeyi basigaranye abana bakiri bato, ubu abana barakuze twumva noneho tumeze neza, turaho, ibi nabyo twumva ari ibyo gushimira Imana.”