Abafashwe barimo ushinzwe ubuhinzi mu Murenge wa Kagogo, rwiyemezamirimo wemerewe na Leta ucuruza inyongeramusaruro no akanagurisha imbuto y’ibigori Leta igenera abaturage ku giciro cyo hasi muri uwo murenge wa Kagogo, n’undi wemerewe na Leta mu gucuruza inyongeramusaruro no kugurisha imbuto y’ibigori Leta igenera abaturage ku giciro cyo hasi mu murenge Gitovu.

Umuyobozi wa Polisi mu karere ka Burera, SP Alex Fata, yavuze ko aba uko ari batatu bafashwe nyuma y’igenzura ryakozwe n’inzego zibishinzwe zirimo n’iz’umutekano zigasanga barakoze amakosa yo guhimba inyandiko no kugurisha abaturage imbuto ku giciro cyo hejuru ugereranyije n’icyashyizweho na Leta.

SP Fata yavuze ati “Tumaze kumenya amakuru ko hari amakosa ari gukorwa mu itangwa ry’inyongeramusaruro n’imbuto y’ibigori bigenewe abaturage, akarere kashyizeho itsinda rigizwe n’inzego z’ibanze n’iz’umutekano rijya gukora igenzura kuri icyo kibazo, nibwo twasanze koko mu mirenge imwe n’imwe hari amakosa yakozwemo.

Yakomeje avuga ati “Hamwe wasangaga bagurisha abaturage inyongeramusaruro n’imbuto ku giciro cyo hejuru ugereranyije n’icyashyizweho na Leta, ahandi ugasanga basinyiye abaturage ko bahawe inyongeramusaruro cyangwa imbuto kandi umuturage ntabyo yabonye ndetse nta n’umubare w’ibiro yahawe. Ibi rero ni icyaha gihanwa n’amategeko.”

SP Fata yavuze ko kugeza ubu iri genzura rimaze gukorwa mu mirenge ya Kagogo, Gitovu na Kinyababa, ariko ko rizanakomereza mu yindi mirenge yose igize akarere ka Burera.

Mu gihe iperereza rikomeje, aba uko ari batatu bafungiye kuri Sitasiyo ya Polisi ya Rusarabuye.

Nizeyimbabazi Jean de Dieu ushinzwe ubuhinzi n’umutungo kamere mu karere ka Burera, yasabye abashinzwe kugeza ku baturage inyongeramusaruro n’imbuto, kubikora bakurikije amabwiriza.

Ati “Turasaba aba bashinzwe kwegereza abaturage imbuto n’inyongeramusaruro kubikora bakurikije amabwiriza ya Minisitiri w’Ubuhinzi, babisaranganye uko biri nta kunama ku muturage, ndetse aya mabwiriza ya Minisitiri bayamanike aho bakorera ku buryo buri muturage abona ko ibyo yagenewe abihabwa mu mucyo.”

Yasabye kandi abaturage bahabwa inyongeramusaruro n’imbuto kubikoresha neza, birinda kubigurisha kugira ngo bongere umusaruro wabo.