CAF yemeje ko Igikombe cya Afurika uyu mwaka kizabera mu Misiri

Yanditswe na Ngabo Roben
Kuya 8 Mutarama 2019 saa 04:02
Yasuwe :
0 0

Inama ya komite nyobozi y’Impuzamashyirahamwe y’umupira w’amaguru muri Afurika, CAF, yateraniye i Dakar muri Sénégal, yemeje ko igikombe cya Afurika cy’uyu mwaka kizakirwa na Misiri mu mpeshyi.

Byari biteganyijwe ko iki gikombe kibera muri Cameroun ariko komite ngenzuzi yashyizweho na CAF isanga iki gihugu kitujuje ibisabwa, bituma batakaza aya mahirwe mu Ugushyingo 2018.

Nyuma ibihugu bibiri byifuje kwakira iri rushanwa, Afurika y’epfo na Misiri. Gusa umunsi umwe mbere yo gutangaza umwanzuro wa CAF, Afurika y’epfo binyuze muri minisitiri wa siporo, Thulas Nxesi, yemeje ko iki gihugu kititeguye gushora amafaranga muri uyu mushinga wo kwakira igikombe cya Afurika.

Byatumye inama ya komite nyobozi ya CAF yateraniye muri Sénégal itangira igihugu kimwe gusa ari cyo gisigaye mu byemeje ko byifuza kwakira iri rushanwa rizahuza ibihugu 24.

Nyuma y’iyi nama, CAF yabinyujije ku rubuga rwayo yemeza ko igikombe cya Afurika giteganyijwe kuva tariki 7 -30 Kamena 2019, kizabera mu Misiri.

Iki gihugu kinasanzwemo ikicaro cya CAF kizakira igikombe cya Afurika ku nshuro ya gatanu nyuma yo kucyakira mu 1959 (nka République Arabe Unie), 1974, 1986, na 2006, icyegukana inshuro eshatu, uretse imwe yonyine yabaye iya gatatu.

Ubwo iki gikombe giheruka kubera mu iki gihugu, ikipe y’igihugu ya Misiri yaranacyegukanye ifashijwe n’abakinnyi bari bagezweho muri 2006 nka Mohamed Aboutrika, Ahmed Hassan, Amr Zaki, Hosam Mido n’abandi.

Misiri niyo izakira Igikombe cya Afurika 2019
Ni ibyishimo bikomeye ku banyamisiri
Ubwo iki gihugu giheruka kwakira iri rushanwa cyararyegukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza