Aya makipe ahuriye mu itsinda D rifatwa nk’irikomeye kurusha ayandi muri CAN 2017, yakinnye kuri uyu wa Kabiri Ghana ibifashijwemo na kapiteni wayo wungirije Andre Ayew itahana amanota atatu ku gitego cyatsinzwe kuri penaliti yatanzwe ikosa ryari rikorewe kapiteni Asamoah Gyan ku munota wa 32.
Uganda yakabaye yanatsinzwe ibindi bitego iyo hataba ubuhanga bw’umuzamu Denis Onyango Denis Onyango uherutse gutorwa nk’uwa mbere ku mugabane wa Afurika akaba yagiye arokora igihugu cye abereye na kapiteni.
Gusa nubwo Uganda yagize igice cya mbere kiri ku rwego rwo hasi cyane, yaje kugaragaza umupira mwiza mu cya kabiri ndetse habuze gato ngo Faruku Miya yishyure.
Uganda yongeye gukorerwaho amateka kuko mu 1978 ubwo yaherukaga muri iri rushanwa yari yatsindiwe ku mukino wa nyuma na Ghana ibitego 2-0 none igarutsemo nyuma y’imyaka 39 itangirira kuri iki gihugu n’ubundi kirayitsinda.
Andre Ayew yatsinze igitego cya 11 muri CAN ahita atambuka kuri se, Abedi Pele wabaye igihangange muri iki gihugu akagitsindira ibitego 10 muri CAN akanagihesha iki gikombe mu 1982, ibintu bikiri inzozi ku bahungu be babiri bari muri iyi kipe, Andre Ayew na Jordan Ayew.
Mu mukino wa kabiri muri iri tsinda, Misiri yari yitezwe kureba uko itangira irushanwa itanga ubutumwa niba koko ishaka kwegukana iri rushanwa ku nshuro ya munani dore ko ari kimwe mu bihugu bihabwa amahirwe gusa Mali bakinaga ntiyayoroheye ndetse bagabanye amanota nyuma yo kunganya 0-0.
Misiri kimwe n’ibihugu bine byo mu Barabu byitabiriye CAN 2017 nta na kimwe cyabashije kubona amanota atatu mu mikino ifungura amatsinda kuko Algeria yanganyije na Zimbabwe 2-2, Tunisia itsindwa na Senegal 2-0, Maroc itsindwa na RDC 1-0.
Kuri uyu wa Gatatu harongera gukina itsinda A aho amakipe yose afite inota rimwe rimwe kuko yose yanganyije ku munsi wa mbere.
Gabon yakiriye irushanwa iraza kwisobanura na Burkina Faso saa 18:00 mu gihe saa 21:00 Cameroun icakirana na Guinea-Bissau imikino yose ibera kuri Stade de l’Amitié, Libreville.
TANGA IGITEKEREZO