Ubwo bibukaga ku nshuro ya 19 Jenoside yakorewe Abatutsi, Abanyarwanda n’inshuti zabo bagera ku 150 baturutse mu bice bitandukanye by’Afurika bateraniye muri kaminuza ya Tekinoloji ya Cape Peninsula iherereye Cape Town muri Afurika y’Epfo, bakora ibikorwa bitandukanye byo kwibuka Jenoside yakorewe Abatutsi muri Mata 1994, banacana Buji eshatu zifite icyo zisobanura.

Buji ya mbere yari ijyanye no kwibuka Abatutsi barenga Miliyoni bishwe muri Jenoside yakorewe Abatutsi mu 1994, buji ya kabiri ni iyo kwibuka umuntu utazwi wishwe muri Jenoside na ho iya gatatu ni iyo kwibuka indi Jenoside iyo ari yo yose yabereye hirya no hino ku Isi.

Mu bindi bikorwa herekanwe filimi ISETA igaragaza ibyabaye muri Jenoside yakorewe Abatutsi, iyo filimi ikaba yarakozwe na Nick Hughes afatanyije n’umuhanzi nyarwanda w’amafilimi Eric Kabera.

Hanafashwe umunota wo kwibuka imiryango yazimye burundu, hanavugwa imivugo ijyanye no kwibuka ndetse no guhamagarira Abanyarwanda gutegura ejo hazaza heza.

Leah Nasson, uhagarariye ishami ry’amateka mu ishuri Mpuzamahanga rya Chesterhouse yagaye uburyo amahanga yatereranye u Rwanda ubwo Jenoside yabaga, ariko kandi anashima intambwe u Rwanda rumaze gutera nyuma y’imyaka 19 Jenoside yakorewe Abatutsi irangiye.

Uwari uyoboye ibiganiro yibukije abari bateraniye mu bikorwa byo kwibuka amwe mu magambo Perezida wa Repubulika Paul Kagame yagejeje ku Banyarwanda tariki ya 7 Mata, 2013, aho yavuze ko kwibuka ari inshingano za buri wese uharanira ko ibibi bitazasubira, asaba urubyiruko ko rwatozwa umuco wo kwibuka kugira ngo ruzabirage n’abazakurikira. Ibi kandi bikazafasha Abanyarwanda guhuriza hamwe imbaraga bagamije guteza imbere igihugu cyabo.