Cogebanque yatanze miliyoni 100 Frw yo kugoboka abagizweho ingaruka na Coronavirus

Yanditswe na Ishimwe Israel
Kuya 4 Gicurasi 2020 saa 07:19
Yasuwe :
0 0

Banki Nyarwanda y’Ubucuruzi ya Cogebanque yahaye Guverinoma y’u Rwanda inkunga ya miliyoni 100 Frw azifashishwa mu gufasha abaturage bagizweho ingaruka n’ingamba zashyizweho mu kwirinda ikwirakwira rya Coronavirus.

Cogebanque nka Banki Nyarwanda ariko itanga serivisi mpuzamahanga kuva mu myaka irenga 20 ishize; yagiye yaguka buri mwaka bituma inashyira imbaraga zayo muri serivisi zigamije guhindura imibereho myiza y’abenegihugu.

Muri icyo cyerekezo cyayo yiyemeje gushyigikira gahunda ya Leta yo gufasha abaturage bagizweho ingaruka na gahunda ya Guma mu rugo igamije gukumira icyorezo cya COVID-19 giterwa n’agakoko gashya ka Coronavirus.

Kuva mu kwezi n’igice gushize, mu Rwanda hafashwe ingamba zatumye imwe mu mirimo ihagarikwa, binagira ingaruka kuri ba nyirayo baryaga ari uko bakoze.

Leta yashyizeho uburyo bwo kugoboka iyi miryango no kuyifasha kubona amafunguro ayitunga muri icyo gihe.

Nubwo kuri uyu wa Mbere, tariki ya 4 Mata 2020, imwe mu mirimo yasubukuwe ariko hari itarakomorerwa ndetse uburyo bwo gufasha abagizweho ingaruka nabwo bugiye kuvugururwa.

Mu gushyigikira Leta, Cogebanque yemeye gutanga inkunga ya miliyoni 100 Frw yo gufasha abagizweho ingaruka.

Ubuyobozi bwa Cogebanque bwatangaje ko ‘bwishimiye gushyigikira ingamba zafashwe by’umwihariko mu gufasha abagizweho ingaruka zikomeye n’iki cyorezo.’

Mu itangazo bwashyize hanze bwavuze ko “Bitewe n’imbogamizi zidasanzwe zatewe n’icyorezo cya COVID-19, Cogebanque PLC izashyigikira gahunda ya Guverinoma yo gufasha. Ubuyobozi bwa Cogebanque buzatanga miliyoni 100 Frw, azashyikirizwa Guverinoma mu rugamba irimo rwo gufasha abagizweho ingaruka n’iki cyorezo.’’

Cogebanque yijeje ko izakora ibishoboka byose ngo ikumire ikwirakwira rya Coronavirus, binyuze mu gushyiraho uburyo bw’ubwirinzi ku bayigana no gukomeza kubaha serivisi zinoze.

Mu gihe Isi n’u Rwanda bigihanganye no kwirinda ikwirakwira rya Coronavirus, abaturarwanda basabwa gukoresha serivisi z’ikoranabuhanga mu guhererekanya amafaranga.

Nyuma y’impinduka kuri serivisi zakomorewe, kuri ubu amashami yose ya Cogebanque ari gukora, uretse irya CHIC rigifunze by’agateganyo kubera imirimo yo kurivugurura.

Cogebanque yashishikarije abaturarwanda n’abayigana kwifashisha serivisi z’ikoranabuhanga, inasaba abakiliya bayo kuryimakaza mu gihe bakoresha konti za Cogem Bank, Internet banking, USSD (*505#) n’amakarita ya banki.

Banki Nyarwanda y’Ubucuruzi ya Cogebanque yatanze miliyoni 100 Frw yo kugoboka abaturage bagizweho ingaruka n'ingamba zo guhangana na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .