00:00:00 IGIHE NETWORK KN KINYARWANDA EN ENGLISH FR FRANCAIS

Congo yongeye kwitwaza u Rwanda mu bitero bikomeye yagabweho na M23

Yanditswe na Musangwa Arthur
Kuya 26 May 2022 saa 11:09
Yasuwe :

Mu buryo bumaze kumenyerwa, Repubulika Iharanira Demokarasi ya Congo yatangaje ko yagabweho ibitero bikomeye n’umutwe wa M23, ndetse ko wabifashijwemo n’u Rwanda. Ni ibirego iki gihugu kitigeze gitangira ibimenyetso.

Umuvugizi wa Guverineri wa gisirikare w’Intara ya Kivu ya Ruguru, Gen Sylvain Ekenge, kuri uyu wa Gatatu yasohoye itangazo avuga ko mu gihe Ingabo za FARDC zikomeje gufatanya na MONUSCO mu guhangana n’umutwe wa M23 yita uw’iterabwoba, zagabweho ibitero kuva mu ntangiro z’iki cyumweru.

Mu mirwano yakurikiyeho, Ingabo za Congo ngo zabashije gusubiza inyuma ababigabye.

Yakomeje ati "Umwanzi yahataye intwaro n’ibikoresho bya gisirikare byafashwe na FARDC. Birimo ibisasu bibiri bya mortier bya milimetero 60, imbunda ya AK 81, ibisasu umunani bya rockettes birasa ibifaru, sheni y’amasasu y’imbunda ya PKM, imyenda ya gisirikare, ingofero n’amacupa abiri ya gisirikare bidakoreshwa yaba ingabo za FARDC cyangwa abakora iterabwoba ba M23."

Yumvikanisha ko ibyo bikoresho bigomba kuba ari iby’ikindi gisirikare kitari mu bihanganye mu ntambara.

Muri iyo mirwano, ku wa 23 Gicurasi Ingabo z’u Rwanda zatangaje ko "ibisasu byo mu bwoko bwa roketi by’Ingabo za FARDC byaguye mu mirenge ya Kinigi na Nyange mu Karere ka Musanze, bikomeretsa abaturage benshi ndetse byangiza ibintu."

Aho kugaruka kuri icyo kibazo, Gn Ekenge yavuze ko ku wa Gatatu tariki 25 Gicurasi, ibirindiro bya FARDC bya Kibumba na Jomba byongeye guterwa, ingabo za leta zikabasha kwihagararaho.

Gen Ekenge ati "Guverineri wa Kivu ya Ruguru akaba n’Umugaba w’Ingabo zaho yasabye akanama gahuriweho gashinzwe gukurikirana ibibazo bihuza imipaka (EJVM) k’Inama mpuzamahanga y’ibiyaga bigari (ICGLR), gukora iperereza ku nkomoko y’ibi bikorwa bikomeye."

Ni akanama n’u Rwanda rwitabaje ku bisasu byarashwe mu Karere ka Musanze.

Nk’aho bitari bihagije, mu nama nshingwabikorwa y’Ubumwe bwa Afurika kuri uyu wa Gatatu, intumwa ya RDC yazamuye ikibazo, iishinja u Rwanda gutanga umusanzu muri ibi bitero bya M23.

Ni ibirego yaremerezaga avuga ko byabaye mu gihe ibihugu bya Afurika byishimiraga umunsi w’ishingwa ry’Ubumwe bwa Afurika, uzwi nka Africa Day.

Muri ibyo bitero uwo mudipolomate avugamo icyagabwe ku birindiro by’ingabo muri Rumangabo, avuga ati "ni muri RDC, ni ibirindiro by’abasirikare ba Congo."

Ni inama yarimo Ambasaderi Hope Tumukunde uhagarariye u Rwanda muri Ethiopia no mu muryango w’Ubumwe bwa Afurika.

Minisiteri y’Ububanyi n’amahanga ya RDC yatangaje ko icyemezo kigaragaza aho iki gihugu gihagaze "cyitezwe kuri uyu wa Kane cyangwa ku wa Gatanu."

Si ubwa mbere RDC ishinja u Rwanda gushyigikira umutwe wa M23, ibintu rutigeze rukozwa na gato.

Muri Werurwe Ingabo za FARDC zatangaje ko abarwanyi b’umutwe wa M23 bafashijwe n’Ingabo z’u Rwanda, bateye ibirindiro byazo ku misozi ya Chanzu na Runyoni muri Rutshuru.

Icyo gihe Gen Ekenge yaje gusohora itangazo avuga ko muri ibyo bitero, Ingabo za FARDC zafashe abasirikare babiri b’u Rwanda.

Abo ngo harimo uwitwa Adjudant Habyarimana Jean Pierre na Uwajeneza Muhindi John uzwi nka Zaje. Rivuga ko baturuka muri Batayo ya 65 n’iya 402 yo mu Ngabo z’u Rwanda.

Nyamara Guverineri w’Intara y’Iburengerazuba, Habitegeko François, yaje gusohora itangazo ryamagana ibyavuzwe n’Igisirikare cya Congo, avuga ko ibishinjwa u Rwanda nta shingiro bifite.

Rigira riti "Turashaka kwamagana byeruye ibi birego bidafite ishingiro no gushimangira ko RDF nta ruhare na ruto ifite mu bikorwa by’ubushotoranyi muri RDC."

Yavuze ko amazina y’abo bagabo babiri yatangajwe n’Ingabo za Congo n’inzego z’ubutasi yigeze gukomozwaho mu biganiro byahuje ibihugu byombi, i Kigali ku wa 25 Gashyantare 2022.

Yongeyeho ati "RDF ntabwo ifite umusirikare n’umwe ufite amazina yatangajwe. Ibi ni uburyo bwo kuyobya abantu binyuze mu kugaragaza abantu bafashwe mu buryo butazwi mu gihe kirenga ukwezi, bakaberekana nk’abafashwe tariki 28 Werurwe 2022."

Ku rundi ruhande, M23 yanditse ku mbuga nkoranyambaga ko abo FARDC yerekanye nk’abasirikare b’u Rwanda bafashwe, ari abashumba atari abasirikare.

Kuko M23 ikomeje kurwana?

Kuva mu 2004, Gen Laurent Nkunda wabaga mu ngabo za Congo yivanyemo, ajyana n’abasirikare be mu misozi ya Rutshuru ashinga umutwe wa CNDP.

Ni umutwe wari ushingiye ku mpamvu zirimo kurwanya ubwicanyi bwakorwaga mu burasirazuba bwa Congo bushingiye ku bwoko, kurwanya imitwe y’inyeshyamba yakoraga ubwicanyi n’ibindi.

Nkunda yaje gufatirwa mu Rwanda mu ntangiriro za 2009 arafungwa, maze CNDP ikuriwe na Bosco Ntaganda yumvikana na leta ya Perezida Joseph Kabila mu masezerano yo ku wa 23 Weruwe 2009.

Nyuma y’agahenge k’imyaka ine, mu 2012 havutse umutwe wiyise M23 (23 Mars) abarwanyi bawo bakuriwe na Ntaganda na Sultan Makenga, uvuga ko amasezerano ya leta na CNDP atubahirijwe.

Uwo mutwe waje gufata Umujyi wa Goma mu 2012, ariko mu bitero bikomeye wagabweho n’ingabo z’akarere waje gutsindwa, abarwanyi bamwe bahungira mu Rwanda, abandi muri Uganda.

Igice kinini cy’abarwanyi bahungiye muri Uganda bongeye gusubira mu mashyamba, bongera gutangiza urugamba ku masezerano bavuga ko atubahirijwe.

Muri Werurwe uyu mwaka M23 yashyize hanze amasezerano y’ibanga yagiranye na Guverinoma ya RDC mu 2020 agaragaza ibyo Leta ya Tshisekedi yemeye kugira ngo ibitero bihagarikwe.

Aya masezerano yasinywe muri Nzeri 2020 ubwo itsinda rihagarariye M23 ryahuraga n’abahagarariye Leta mu Murwa Mukuru i Kinshasa, bagasezerana ko abarwanyi ba M23 bagera ku 6000 bazinjizwa mu ngabo haherewe ku bakiri bato naho abakuze bagafashwa gusubizwa mu buzima busanzwe. Ibi bikorwa byagombaga gukorwa bitwaye 1.334.605 $.

Ibyo byose ariko ngo ntibyakozwe. Aho kwita ku byo uvuga no kubishakira umuti, Guverinoma ya Congo yakomeje gushakira impamvu ahandi, ko imbaraga umutwe wa M23 ufite uzihabwa n’u Rwanda.

Mu gihe mu biganiro Perezida Tshisekedi yaje gutangiza i Nairobi muri Kenya hamwe n’imitwe yitwaje intwaro hashakwa uburyo yahagarika imirwano, M23 yaje gusohorwamo.

Ni icyemezo cyafashwe ubutegetsi bwa Congo bumaze umenya ko mu gihe bamwe bari i Nairobi, mu mashyamba ya Congo impande zombi zakozanyijeho.

Ingabo za Congo zavugaga ko M23 ari yo yabashotoye igaba ibitero ku birindiro byazo, mu gihe uwo mutwe na wo washinje ingabo za Leta ko ari zo zarashe isasu rya mbere.

Gen Ekenge akomeje kugira u Rwanda urwitwazo mu bitero bya M23
Ibitero bya FARDC biheruka gukomeretsa abantu mu Kinigi
Intumwa z'ibihugu bigize AU bikoraniye mu nama idasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .