Dr. Habumurembyi uyobora Urwego rw’Igihugu rushinzwe Intwari z’Igihugu, Imidari n’Impeta z’Ishimwe (CHENO) mu Rwanda, yavuganye na IGIHE ari i Malabo muri Guinée Equatoriale asobanura ko ubundi kuba umuyobozi w’itsinda ugomba kuba warabaye Umukuru w’Igihugu cyangwa uwa Guverinoma.

Yagize ati “Nyoboye itsinda ry’abantu 30 bavuye mu bihugu 30 bya Afurika, rigizwe ahanini n’abagize inteko zishinga amategeko mu bihugu, abagize inteko ishinga amategeko Nyafurika ndetse n’abahagarariye imitwe ya politiki.”

Yakomeje avuga ko iri tsinda icyo ririmo guhurizaho ari ugushima imiyoborere myiza ya Perezida Paul Kagame, kandi Afurika iterwa ishema n’uburyo u Rwanda rukomeje kwerekana ko byose bishoboka yaba gukora neza no gutera imbere.

Ibarura ry’abazatora muri Guinée Equatoriale ryabaye muri Kanama, ryagaragaje ko abantu 325 554 bazitabira amatora. Imibare ya Banki y’Isi yo mu 2016 yerekanye ko iki gihugu gituwe n’abaturage 1 220 000. Gifite amashyaka ya politiki 18.

Dr Habumuremyi yabaye Minisitiri w’Intebe tariki ya 7 Ukwakira 2011, asimbuye Bernard Makuza ava kuri uyu mwanya tariki ya 23 Nyakanga 2014 asimburwa na Murekezi Anastase. Yanabaye Minisitiri w’Uburezi kuva muri Gicurasi 2011 kugeza mu Ukwakira 2011.

Uyu mugabo w’imyaka 56 yavukiye i Ruhondo mu Karere ka Musanze tariki ya 20 Gashyantare 1961, yize mu bihugu bitandukanye harimo Repubulika Iharanira Demokarasi ya Congo, u Bufaransa na Burkina Faso. Afite impamyabumenyi y’ikirenga (PhD) yakuye muri Kaminuza ya Ouagadougou, nyuma y’ubushakashatsi yakoze hagati y’imyaka ya 2006 na 2011.

Dr. Habumurembyi, Umuyobozi w'Urwego rw’Igihugu rushinzwe Intwari z’Igihugu, Imidari n’Impeta z’Ishimwe (CHENO)