Ubuyobozi bwa Kaminuza bwatangaje ko Dr Musafiri ayinjiranyemo inararibonye rizatuma atanga umusaruro ukomeye mu iterambere rya Kaminuza no gutanga uburezi bufite ireme nk’intego nyamukuru yayo.

Dr Musafiri Papias Malimba, yari asanzwe ari Umuyobozi wungirije wa Kaminuza y’u Rwanda ushinzwe Igenamigambi n’Imiyoborere (Deputy Vice Chancellor for Strategic Planning and Administration) kuva mu 2018.

Yabaye Minisitiri w’Uburezi mu Rwanda kuva mu 2015, umwanya yagiyeho avuye ku buyobozi bw’Ishami ry’Imari n’Amabanki muri Kaminuza y’u Rwanda mu yahoze ari SFB, kugera muri 2017.

Dr Malimba yagiye afata ibyemezo bitandukanye birimo gutangiza igenzura no gufunga Kaminuza zitujuje izindi zihagarikirwa amashami.

Uretse Dr Malimba Papias wahawe inshingano muri iyi Kaminuza, Inama y’Ubutegetsi yagize Rev. Patrick Emery Habonimana Umuyobozi Wungirije ushinzwe Imari n’Umutungo mu gihe Dr Slyvestre Munyengabe yagizwe Ushinzwe imiyoborere.

East African Christian College (EACC) yubatse i Masaka mu Mujyi wa Kigali. Ni Kaminuza Nshya kuko yemejwe n’Inama y’Abaminisitiri mu Ukuboza 2020.

Kugeza ubu itanga amasomo arimo Iyobokamana (Theologie), Ubuhanga mu by’Imikurire y’Abana (Children Development), gukurikirana no kugenzura ibikorwa by’amajyambere (Monitoring and Evaluation), Amashami y'Ubuvuzi arimo 'Bachelor of Science in General Nursing na Bachelor of Sciences in Widwifery; Advanced Diploma in General Nursing na Advanced Diploma in Widwifery.'

EACC ifite n'umwihariko wo kuba ifite ECD, irerero ry'abato icunga ku bufatanye n'Umujyi wa Kigali.