Igiceri Program, ni gahunda ifasha abaturage kugira umuco wo kuzigama, bahereye ku giceri cy’amafaranga 100, ibi bikabageza ku rwego rwo gufungura konti muri sacco bakabasha kwiteza imbere.

Amafaranga 100 bajyaga bayapfusha ubusa bakayafata nk’atariho, hari ababuraga amafaranga ibihumbi 6000 yo gufunguza konti muri SACCO, kwishyura ubwisungane mu kwivuza byari ingorabahizi.

Igisubizo cy’ibi bibazo byose abatuye mu murenge wa Bumbogo bahuraga nabyo, ngo ni gahunda yiswe Igiceri Program, yatangijwe kuri uyu wa 30 Ukwakira 2015.

Mukarwego Alphonsine umugore uvuga ko atagiraga konti, iyi gahunda ikaba igiye kumugeza ku rwego rw’ababitsa mu kigo cy’imari.

Yagize ati ‘ Iyo nabaga mfite igiceri cy’amafaranga 100 numvaga ko ntacyo amaze, kuko nta na konti ngira ngo nyabitse. Ariko ubu ngiye kujya nzigama igiceri ku buryo nta kibazo cyo kwishyura mituweri nzongera kujya ngira, umwaka uzajya gushira mfite ubwizigame buhagije.’

Nduwayezu Alfred umunyamabanga nshingwabikorwa w’umurenge wa Bumbogo, yavuze ko n’ubwo iyi gahunda yitwa Igiceri program, n’ufite inote bitazamubuza kuzizigama.

Yagize ati ‘ Twihaye intego y’uko nibura muri buri mudugudu mu gihe cya vuba tugomba gusangamo abanyamuryango 200 ba Sacco.Aya mafaranga mwita macyeya azagwira, abageze ku iterambere.Ibiceri mwasuzuguraga mushyire mu gasanduku , mu bibitse kuri sacco ibungukire kandi ibagurize.’

Umucungamutungo wa Zamuka Sacco Gikomero, Esdras Niyonsenga , yavuze ko imfunguzo z’udusanduka zibikwa n’abakozi b’Umurenge Sacco badufungura hagezemo amafaranga ibihumbi 20.000, mu gihe agasanduku kabikwa n’umuturage bagenzi be bazajya bagirira icyizere cyo kukabika.

Gahunda y’igiceri Program, yatangiriye mu murenge wa Nduba mu karere ka Gasabo, aho abaturage bahereye ku kuzigama igiceri cy’amafaranga 100, bamaze kwizigama miliyoni zisaga miliyoni 11.

[email protected]