Aba bacuruzi biswe “Intore z’imbaturabukungu” bishatsemo ayo mafaranga ubwo bakirwaga n’ubuyobozi bw’Akarere ka Gasabo bavuye mu itorero.

Bagaragaje ko imwe mu ndangagaciro bigishijwe mu itorero bavuyemo ari ukwishakamo ibisubizo by’ibibazo bibugarije, bityo ko batarebera Abanyarwanda birukanwe Tanzaniya bababariye mu karere ngo bategereze ko hari abazava hanze ngo babakemurire ibibazo.

Buri wese muri bo yagiye afasha abanyarwanda birukanywe bitewe n'uko yifashije

Aba bacuruzi bemeza ko n’ubwo batabashije kubonera rimwe miliyoni 230 zikenewe ngo aba Banyarwanda babone icumbi, buri wese aramutse atanze uko yishoboye yose yaboneka bidatinze.

Mu kwezi gushize aka karere katangije igikorwa cy’ikusanyabufasha, cyo kugoboka Abanyarwanda birukanwe muri Tanzaniya bagatuzwa mu Bweramvura mu murenge wa Jabana, aho badafite amacumbi ahagije.

Radiyo 10 iherutse gusura aba baturage isanga hari imiryango 7 igizwe n’abantu basaga 24 batuye mu cyumba cy’ishuri kimwe.Umunyamakuru w’iyi radiyo yavuze ko yasanze uburyo babayemo ‘buteye agahinda’.

Yagaragaje ko muri iryo shuri iyo miryango ituyemo ababyeyi bararana n’abana, kugira ngo hatandukanywe uburiri bw’umuryango umwe n’undi hakiyambazwa ibitenge n’inzitiramibu byashaje.

Umuyobozi w’umurenge wa Jabana Kalisa Jean Sauveur avuga ko kuva mu ntangiriro z’umwaka wa 2014, aba Banyarwanda batangiye kubakirwa amacumbi ariko umushinga wagera hagati ukazitirwa n’amikoro make .

Akarere ka Gasabo kasobanuye ko hakenewe miliyoni 230 kugira ngo hubwakwe inzu 48 zo kubagoboka.

Kuba habonetse miliyoni 20, bisobanuye ko hagikenewe izindi 210, ariko nazo ubuyobozi bw’aka karere bufite icyizere ko azaboneka aba baturage bagatangira kubakirwa nibura bitarenze ukwezi kwa Kamena.