Abaturage bo mu karere ka Gasabo mu murenge wa Rutunga, bishimiye ibyiciro bivuguruye by’ubudehe byashyizweho , ngo kuko ibyari bisanzwe babibonagamo ibitutsi.

Ku ikubitiro igikorwa cyo gushyira abaturage mu byiciro bishya by’ubudehe, cyabereye mu kagari ka Kibenga mu mudugudu wa Kibenga tariki ya 2 Gashyantare 2015, kuri sitade ya Rutunga ahari hateraniye abaturage bo muri uyu murenge, n’abayobozi mu nzego zitandukanye.

Nyuma y’ibisobanuro bahawe n’inzego z’ibanze, abaturage ni bo bashyira bagenzi babo mu byiciro, bashingiye ku makuru nyirubwite atanze.

Mukarusine Rose, ni umwe mu bavuze ko yashimishijwe n’ibi byiciro bivuguruye . Yagize ati “Ibyiciro byari bisanzwe wabonaga harimo ibintu by’ibitutsi, umuntu akitwa umuhirimbire, umutindi nyakujya n’ayandi , abayobozi bacu barakoze kubihindura . Ibi bishya turabyishimiye kuko nta mazina bifite.”

Ntabanganyimana Tharcise nawe yavuze ko yishimiye ibyiciro bishya. Ati “ Kuba ibi byiciro bishya bidafite amazina ni byiza cyane. Bimwe byari bisanzwe, umuntu yagiraga n’isoni zo kuvuga icyiciro arimo kubera izina ryacyo.”

Hope Tumukunde, Umuyobozi wungirije w’Umujyi wa Kigali ushinzwe imibereho myiza y’Abaturage, yasabye abaturage gutanga amakuru atarimo ibinyoma.

Yagize ati “Ariya makuru mutanga ni yo inzego zitandukanye zishingiraho zikora igenamigambi ry’Igihugu afasha kandi no kumenya ibibazo abaturage bafite. Mukwiriye kuyatanga mudashyizemo amarangamutima. Ibyiciro byakozwe mbere hari ukuntu bitari byarakozwe neza.”

Nyirabahire Languide, Umuyobozi w’Akarere ka Gasabo ushinzwe imibereho myiza, yavuze ko hari ikizere cy’uko ibi byiciro bizakorwa neza , kuruta iby’ubushize ngo kuko abaturage ubwabo aribo bashyira bagenzi babo mu byiciro.

Inyito enye zasimbuye esheshatu zari asanzwe:

Icyiciro 1

a) Umuryango ubona ibyokurya biwugoye,
b) Kuba nta bushobozi bwo gukodesha inzu,
c) Babona ibikoresho by’ibanze mu buryo bugoranye.

Icyiciro 2

a) Kuba bafite inzu yabo,
b) Igihe kinini babona ibyo kurya,
c) Ahanini bakorera abandi,
d) Abakozi babona akazi rimwe na rimwe

Icyiciro 3

a) Bafite nibura umuntu 1 ukorera Leta cyangwa abikorera,
b) Bafite nibura umuntu 1 wikorera,
c) Abahinzi borzoi basagurira isoko,
d) Bafite nibura umuntu 1 uri mu bucuruzi buciriritse cyangwa abadandaza

Icyiciro 4

a) Bafite umuntu uri mu bucuruzi buhambaye,
b) Bafite nibura umuntu 1 ufite isosiyete itanga zihariye nko gutwara abantu n’ibintu , konsuritanse
c) Bafite nibura umuntu 1 uri ku rwego rwo hejuru rw’ubuyobozi,
d) Badite umuntu ufite uruganda,
e) Bafite inyubako z’ubucuruzi mu mijyi minini cyangwa ubundi bucuruzi bwagutse.

Amazina y’ibyiciro byari bisanzwe ni Abahanya, Abatindi Nyakujya, Abatindi, Abakene, Abakene Bifashije, abakungu n’abakire.

[email protected]