Urubyiruko rutandukanye rutuye mu murenge wa Gatsata mu karere ka Gasabo ruravuga ko rubangamiwe n’uko mu murenge rutuyemo nta bibuga n’ibyumba by’imyidagaduro biharangwa bigatuma mu mwanya wo kuruhuka bamwe muri bo babatwa n’ibiyobyabwenge.

Ibi ni bimwe mu bibazo urubyiruko rutandukanye rwahuriye mu nteko rusange ya II yarwo mu murenge wa Gatsata rwagaragaje.

Bagaragaje ko kutagira ibyuma by’imyidagaduro n’ibibuga by’imikino itandukanye ari kimwe mu bituma muri uyu murenge hakigaragara urubyiruko rwishora mu biyobyabwenge kubera kubura icyo rukora n’aho rwidagadurira.

Muri iyo nteko rusange urubyiruko rutandukanye rwibumbiye mu makoperative rwishimiye bimwe mu byo rwagezeho mu mwaka ushize birimo gushinga ihuriro rihuza urubyiruko rwibumbiye muri koperative zigera kuri 15, kurihira abatishoboye mituweli …

Umunyamabanga nshingwabikorwa w’agateganyo w’umurenge wa Gatsata, Gertrude Urujeni yabwiye IGIHE ko hari byinshi urubyiruko rwagezeho ariko ko rukibangamuirwa n’ikibazo cyo kutagira aho rwidagadurira.

Yagize ati “ Ubu urubyiruko rwahize gahunda nyinshi zuzuzanya n’iza leta zirimo kubungabunga ibidukikije ariko nta nzu z’imyidagaduro cyangwa ibibuga byavana urubyiruko mu bwigunge birangwa mu murenge wa Gatsata ku buryo n’iyo bashaka kwidagadura bibasaba gukodesha inzu babikoreramo”.

Ali Uwimana umuhuzabikorwa w’Inama y’igihugu y’urubyiruko mu murenge wa Gatsata nawe yagaragaje ko urubyiruko rwo muri uyu murenge rwishimira ibyo rwagezeho ariko ko rubangamirwa cyane no kutagira ikibuga cyangwa ibyumba by’imyidagaduro.

Yakomeje avuga ko iki kibazo bakigeza kuri buri muyobozi wese ubasuye ku buryo benshi muri bo banabizeza ko bazagikemura ariko bikarangira nta gikozwe.

Habineza Pascal umuyobozi Cooperative For Energy (COFEP) nawe vuze ko kwigunga bituma bamwe muri bo bishora mu biyobyabwenge n’ibindi bidahwitse.

Yagize ati “ Twe nka koperative twishimira ibyo imaze kugeraho kuko ubu dufite ikigo cy’ishuri cyigisha iby’amashanyarazi yo mu nganda no mu nzu ariko ikintu kitubabaza n’uko usanga n’iyo turangije akazi tubura aho kwidagadurira kukonta bibuga nta n’ibyumba by’imyidagaduro tugira bigatuma bamwe muri twe bishora mu bibi”.

Urubyiruko rwitabiriye iyi inteko rusange ya II mu murenge wa Gatsata rwasagaga 250.