Abibumbiye muri Koperative “Kabarore United Trade and Cooperative” (KUTC) ikorera mu Mujyi wa Kabarore mu Karere ka Gatsibo, bongeye gutaka igihombo gikomeye bavuga ko baterwa no kuba imodoka zarabujijwe kongera guhagarara hafi y’amaduka yabo bakabura abakiriya, bityo bagasaba guverineri kwinjira mu kibazo cyabo akagikemura.

Igihombo aba baturage bavuga gishingiye ku kuba abakiriya barabaye bake, maze abakodesha inzu zabo bakagwa mu gihombo kuko amafaranga babona adashobora kubishyurira imisoro n’ibindi bisabwa. Byongeye kandi kandi, KUTC ikavuga ko nta gihindutse yagorwa no kugaruza miliyoni umunani iherutse gutanga ikora isuku yategetswe n’akarere.

Rutebuka Vincent, Umucungamutungo muri KUTC yabwiye IGIHE ko mu gihe cy’amezi abiri gusa babara igihombo gisaga miliyoni ebyiri, kandi ngo gishobora kwiyongera kuko umubare w’abacururiza mu nyubako yabo batabona amafaranga y’ubukode ukomeza kwiyongera.

Yakomeje avuga ko bamwe mu bacururiza muri iyi nyubako batakibona imisoro ndetse n’ibindi basabwa, ku buryo bikomeje gutyo bamenyesha leta mu buryo busesuye ko baguye mu gihombo, bagahagarika kwishyura amafaranga asaga miliyoni 4 yinjiraga mu isanduku ya leta abaturutseho.

Amazu y'ubucuruzi yatewe igihombo no kwamburwa imodoka zahahagararaga

Ikibazo gisa nk’icyananiye akarere cyane ko harimo kuvuguruzanya kutoroshye kw’inzego. Uyu muyobozi avuga ko umuti w’ikibazo cyabo bawutegereje kuri Guverineri w’Intara y’Uburasirazuba.

Rutebuka ati “Turasaba Guverineri kwinjira mu kibazo cyacu, akaturenganura kuko turabona harimo akarengane kadasobanutse”.

Byose bijya gutangira…

Amakimbirane hagati ya KUTC n’ubuyobozi yatangiye mu ntangiriro za 2014, ubwo ubuyobozi bw’Umurenge wa Kabarore bwabwiraga aba bacuruzi ko bagomba gushyira amabuye imbere y’imiryango bakageza kuri kaburimbo, ahantu hareshya na metero 60 z’uburebure na metero 17 z’ubugari. Abacuruzi bavuze ko byakorwa ariko ikibazo ariko bagaragaza impungenge z’uko nta masezerano agenga ubutaka yari ahari ngo yerekane uko aho hantu hagiye gukorwa.

Ubuyobozi bw’akarere bwasabye aba bacuruzi ko bakora aho hantu cyangwa bagafungirwa, ariko nabo bakomeza gusaba ko bakwerekwa amasezerano yanditse agaragaza ko bahakoze hakagira ugira uruhare mu kuhangiza azabyishyura kugira ngo batabihomberamo, akarere kabatera utwasi.

Ubwumvikane kuri iki kibazo bwakomeje kuba buke, maze muri Kamena, ubuyobozi bw’akarere buhagarika ubucuruzi ku mazu 22 y’iyi koperative.

Abagize KUTC bageze aho bava ku izima

Rutebuka Vincent yabwiye IGIHE ko nyuma y’ubwumvikane buke baje kuva ku izima bemera gukora ibyo akarere kabasabaga, batinya ingamba zikomeye bashoboraga gufatirwa.

Uyu muyobozi muri KUTC yavuze ko aho bubatse hasanzwe hahagarara imodoka zinatuma habona abakiriya hakaba nyabagendwa, bityo mu rwego rwo kuhubaka mu buryo burambye habatwara miliyoni zisaga 8.

Ubwo ahakorwaga hari harangiye, Umuyobozi w’akarere ngo yabahaye urwandiko rubemerera kongera gukora nk’uko bisanzwe ndetse n’imodoka zahahagararaga ziragomorerwa.

Nyuma yo kuhakora uko babisabwaga, Polisi nayo yanze ko imodoka zongera kuhahagarara

Inzego zaravuguruzanyije, abacuruzi babihomberamo

Ubuyobozi bwa Kabarore United Trade and Cooperative buvuga ko n’ubwo Umuyobozi w’akarere yari yabahaye uburenganzira bwo kongera gukora nk’ibisanzwe ndetse hakongera kuba nyabagendwa (imodoka zihahagarara), batunguwe no kubona abashinzwe umutekano babuza imodoka zihahagarara, kuva ubwo batangira kubura abakiriya.

Yagize ati “Twagiye kubona tubona baraje babuza imodoka kuhanyura, n’uyu munsi barakirirwa bahahagaze imodoka zikazamuka ruguru mu mujyi. Ni ukuvuga ngo n’undi muntu wese wigendera iyo abonye hari abapolisi ntabwo ahahagarara, wagira ngo ni nk’ikibuga cyo kwifotorezaho nta muntu ucaracara. Ukibaza uti ese ni nde uzakurenganura, Meya yaratwemereye abapolisi bo ntibabyumva.”

Rutebuka yakomeje avuga ko iki kibazo kibangamiye bikomeye inyungu zabo nka koperative kuko abacururiza muri iyi nyubako batangiye guhomba bakabura amafaranga y’ubukode, ariko ngo igihombo kigiye no kugera kuri leta kuko miliyoni 4 bishyuraga mu isanduku ya leta batakiyabona, bityo bakaba bagiye kumenyesha leta ko bahombye.

Icyo akarere ka Gatsibo kavuga kuri iki kibazo

Ruboneza Ambroise, Umuyobozi w’Akarere ka Gatsibo yabwiye IGIHE ko ikibazo cya Kabarore United Trade and Cooperative kizwi kandi kiri gushakirwa umuti urambye, ari nayo mpamvu gisa nk’aho gitinze gukemuka.

Yagize ati “Turaza kubikemura mu buryo bose bishimiye, iyo ushaka igisubizo hari ubwo ukererwa kugira ngo ubone umuti urambye udahubutse.”

Ruboneza yavuze ko magingo aya nta kosa na rimwe abagize iyi koperative babarwaho kuko ibyo basabwaga byose babikoze. Ku ruhande rw’ubuyobozi ngo nta kuvuguruzanya n’inzego z’umutekano kwabayeho kuko kubuza imodoka guhagarara hafi y’inyubako y’aba baturage byari mu rwego rwo kubungabunga umutekano wo mu muhanda, gusa ngo umuti w’iki kibazo cyose uraboneka vuba.

Polisi y’Igihugu yatsimbaraye…

Umuvugizi wa Polisi y’Igihugu SSP Benoit Nsengiyumva ku murongo wa telefoni na IGIHE yasobanuye ko aho abacuruzi basaba ko imodoka zahagarara hatagenewe icyo gikorwa, ahubwo ngo zagenewe gare hafi aho, ari naho zigomba kujya.

SSP Nsengiyumva avuga ko aho abo bacuruzi batunganyije mu by’ukuri atari gare, ahubwo ari parikingi isanzwe, ngo imodoka z’abantu ku giti cyabo (zidatwara abagenzi) zemerewe kuhahagarara mu gihe ba nyirazo bahahira muri iyo nyubako.