Akarere ka Gatsibo kasezereye abayobozi batatu batagejeje ku manota basabwa ngo bakomeze guhagararira rubanda, abandi babiri bihanangirizwa bwa nyuma bitewe n’uko bari ku kigero gicumbagira mu miyoborere.

Abakozi basezerewe barimo Bugire Emmanuel wari ushinzwe imari n’ubutegetsi mu karere ka Gatsibo, abanyamabanga nshingwabikorwa b’utugari barimo Ntabara Juvenal w’Akagari ka Rubira mu Murenge wa Gitoki, na Antoine Gahutu wo mu kagari ka Kibare mu murenge wa Nyagihanga.

Nk’uko byemezwa n’Umunyamabanga Nshingwabikorwa w’akarere ka Gatsibo, Rukundo William, amabaruwa asezerera aba bakozi yanditswe muri iki cyumweru nyuma yo gukorerwa igenzura, bakaboneka mu cyiciro cyo hasi mu kuzuza inshingano mu kazi.
Rukundo yagize ati “Igenzura ku bakozi ryatangiye ku itariki ya 12 Kanama, ribanza gukorwa n’ubunyamabanga ku nshuro ya mbere, risubirwamo na Komite y’akarere iyobowe n’Umuyobozi wako, rivamo gusezerera aba bayobozi kuko bagize amanota make atabemerera gukomeza kuyobora.”

Amanota agabanya abayobozi mu byiciyo bine birimo abitwa Indashyikirwa baba baragize hejuru ya 80% mu kuzuza inshingano, Inkomezamihigo hagati ya 79-70, abihanangirizwa batujuje inshingano uko bikwiye hagati y’amanota 69-60, n’abasezererwa bari munsi y’amanota 60 abaserewe bisanzemo.

Ubuyobozi bw’Akarere ka Gatsibo bwemeza ko buri wese yazize imikorere ye mibi itamwemerera gukomeza kuba indorerwamo ya rubanda.

Nubwo Ubunyamabanga bwemeza ko igenzura ryakozwe mu mucyo, bamwe mu bayobozi mu karere bavuga ko batigeze bamenya igihe byakorewe, ahubwo bagenda bumva imyanzuro nk’iyo batazi aho ituruka.

Umwe mu bakozi b’akarere ka Gatsibo utashatse ko amazina ye atangazwa, yagize ati “Sinigeze menya igihe iryo genzura ryakorewe, yewe nta n’uwarinkoreyeho, uretse ko numvaga ko hari umuyobozi wabitse dosiye yanjye avuga ngo azayigenzurira.”

Iri genzura mu karere ka Gatsibo ngo ryaba ari imwe mu nzira zo gutuma abayobozi besa imihigo, kandi bakagira umurava wo guharanira iterambere aho gutekenika. Igenzura ry’abakozi ryashyizweho n’amabwiriza ya Minisitiri w’abakozi ba Leta n’umurimo, aho abakoze neza bashimwa, abagize amanota ari munsi ya 60 bagasezererwa nta nteguza.

[email protected]