Ibi babigarutseho ku wa 27 Nzeri mu 2023 mu birori bisoza Umushinga w’Iterambere wa Kahi bagaragaza ko nubwo ibikorwa by’uyu mushinga birangiye, basigiwe ubumenyi buzakomeza kubafasha mu buzima bwabo bwa buri munsi.

Mu myaka 17 uyu mushinga wa Kahi Area Programme umaze, wafashije aba baturage kwikura mu bukene, bahanga imirimo, abana bitabira amashuri.

Wafashije mu kugabanya igwingira, koroza abaturage amatungo magufi n’amaremare, kurinda amakimbirane mu miryango, gukwirakwiza amazi meza, ndetse no kuzamura imyumvire y’abaturage.

Umuyobozi w’Akarere ka Gatsibo, Richard Gasana, yashimiye uruhare World Vision yagize mu iterambere n’impinduka nziza mu mibereho myiza y’abaturage mu gihe cy’imyaka 17.

Ati “World Vision turayishima kuko yabaye intumwa nziza igatumika, igakora ibikorwa byiza biri mu murongo w’igihugu cyacu, turashimira cyane uwayitumye ari we Nyakubahwa Perezida wa Repubulika Paul Kagame, ni igihugu muri rusange cyatumye World Vision muri aka karere, kandi ibyo bayitumye yabikoze mu gihe gikwiye.”

“Imibare igaragaza ibibazo byari bihari n’ibikorwa bakoze harimo intera ndende ku bice byose, mu myaka 17 ishize Nyakubahwa Perezida wa Repubulika yararebye asanga World Vision ikenewe muri aka karere mu murenge wa Kabarore n’uwa Gitoki ndetse isoza ubutumwa babikoze neza ku bipimo byose n’ibitaragerwaho ijana ku ijana bazakomeza kubikorana natwe.”

Umuyobozi wa World Vision ushinzwe ibikorwa, Innocent Mutabaruka, ari nawe wari uhagarariye Umuyobozi Mukuru wa World Vision muri iki gikorwa, yashimiye Ubuyobozi bw’Igihugu n’Akarere ka Gatsibo gakorana n’imishinga itandukanye irimo na World Vision.

Ati “Biragaragara ko abaturage bafite ubushobozi butari ubw’imbere gusa ndetse no mu mufuka byerekana ko mu miryango yacu ibintu bimeze neza, ibyo byose rero twabigezeho dufatanyije n’abafatanyabikorwa kubera politiki nziza Leta y’u Rwanda yashyizeho idufasha kugira ngo twegere abaturage dufatanye muri rya terambere rirambye.”

Muteteri Ruth wari uhagarariye abana bafashijwe n’umushinga wa World Vision yashimye uruhare uyu mushinga wagize mu guhindura imibereho yabo ndetse bamwe bahiga ko bagiye kugira uruhare mu guteza imbere abandi batishoboye.

Ati “Turashimira cyane World Vision kuba yaradufashije mu myigire yacu ndetse bamwe muri bagenzi banjye harimo ababonye uruhushya rwo gutwara ibinyabiziga, harimo abadozi ,abandi barasuka muri make World Vision yatumye twigirira icyizere cy’ejo hazaza, ndetse natwe tubasezeranyije ko tuzagira uruhare mu gufasha abana batishoboye.”

Mukandabana Evangeline, umwe mu baturage bafite umuryango watejwe imbere na World Vision, yishimiye ko yatumye ingo zabo ziteza imbere ndetse no guhindura imyumvire.

Ati “Ndashimira cyane uyu mushinga wahuguye umugabo wanjye, cyane ko iduha amahugurwa atandukanye ya ‘Hinduka wigire’ yatumye ingo zacu zimenya ubwenge, umugabo wanjye yamaze guhinduka mu mutwe no ku mutima afata inzira ajya i Kigali i Masoro arakora kugira ngo no ku mufuka hahinduke, nanjye uraha uyu mushinga waradufashije uduha amafaranga aherekejwe n’amahugurwa ubu ndakora ndi umudozi ufite ibikoresho bigezweho.”

Binyuze muri uyu mushinga wa Kahi Area Programme ababyeyi bagera kuri 67.3 % babasha kubonera abana babo ibyo bakenera badategereje inkunga iyo ariyo yose, ibigo byose by’amashuri 100% bifite ubwiherero bwujuje ibisabwa.

Ingo zigera kuri 76.8 % zifite aho zikura inyungu harenze hamwe nyuma yo guteza imbere ibikorwa by’ubukorikori n’ibindi bidashingiye ku buhinzi, abaturage bagera kuri 93.5 % babasha kubona amazi ku ntera itarengeje iminota 30 uvuye aho batuye.

Ibikorwa by’uyu mushinga kandi byatumye abana 98.4% bamenya gusoma babifashijwemo n’amasomo yashyizweho.

Ibikorwa bya World Vision bizakomereza mu bindi bice bitandukanye by’igihugu mu rwego rwo guha ubushobozi abaturage bagasigara bafite ubushobozi bwo guhangana n’ibibazo bahura nabyo mu buzima bwabo bwa buri munsi.

Umuyobozi wa World Vision ushinzwe ibikorwa, Innocent Mutabaruka, ari nawe wari uhagarariye Umuyobozi Mukuru wa World Vision muri iki gikorwa

Richard Gasana Umuyobozi w’Akarere ka Gatsibo yashimiye World Vision yabaye intumwa nziza igasohoza ubutumwa bw'abayitumye

Muteteri Ruth avuga ko World Vision yubakiye umuryango we inzu ndetse imufasha no kubona akazi k’imyaka itatu kamufashije kwiyishyurira akiga kaminuza

Innocent Mutabaruka ari nawe wari uhagarariye Umuyobozi Mukuru wa World Vision muri iki gikorwa yashimiye yashimiye Ubuyobozi bw'Akarere ka Gatsibo bukorana n’imishinga itandukanye irimo na World Vision

Mukandabana Evangeline umwe mu baturage bafite umuryango watejwe imbere na World Vision yishimiye ko yatumye ingo zabo ziteza imbere ndetse no guhindura imyumvire

Ibikorwa by’uyu mushinga byatumye abana 98.4% bamenya gusoma babifashijwemo n’amasomo yashyizweho

Chris Eazy asusurutsa abaturage ba Gatsibo bari baje kwishimira ibikorwa Wolrd Vision imaze kubagezaho

Richard Gasana Umuyobozi w’Akarere ka Gatsibo yashimiye uruhare World Vision yagize mu iterambere n’impinduka nziza mu mibereho myiza y'abaturage mu gihe cy'imyaka 16 imaze ikorana nabo

Richard Gasana Umuyobozi wa AKarere ka Gatsibo yakira inyandiko zigiragaza ibikorwa bya Kahi Area Programme imaze imyaka 16 ikorera muri aka karere