Gutera amabuye imodoka y’Umunyamabanga Nshingwabikorwa w’Umurenge wa Gitoki, no kumena ibirahure by’imodoka ya gisirikare itewe amabuye muri Nyakanga, ni yo yabaye intandaro yo gufungira abaturage utubari twose two mu gasantere ka Nyamirama mu Murenge wa Gitoki, mu Karere ka Gatsibo.

Nyuma yo kugirirwa inama kenshi n’ubuyobozi bw’Akarere ka Gatsibo, abaturage n’abacuruza mu tubari twa Nyamirama bamaze hafi ukwezi barafungiwe imiryango kubera ibikorwa bitandukanye by’urugomo biterwa n’ubusinzi bukabije burangwa muri aka gasantere.

Bamwe mu baturage n’abacuruza inzoga i Nyamirama baganiriye na IGIHE, bafite imyumvire itandukanye kuri iki kibazo abenshi bakemeza ko muri aka gace haba urugomo rwo ku rwego rwo hejuru, akenshi ngo ruterwa n’inzoga zikaze zihacururizwa.

Aba baturage ntibifuje ko amazina yabo ajya ahagaragara

Uwa mbere ati "Hano haba urugomo rudasanzwe kandi ruterwa n’ubusinzi bukabije, abaturage binywera inzoga bita "imizinyu" ikaze cyane bitewe n’ibyo bavangavangamo ariko sinzi uko imera kuko narayitinye pe”.

Undi ati “Siriduwili izica abantu inaha, barayinywa kuva mu gitondo bamwe bakanayiraramo wajya kumva ukumva induru ziravuga bamaranye barwana ndetse basigaye barayibatije ngo ni "siridumwice".

Umwe mu bafungiwe akabari ati "Sinahakana ko hataba urugomo nawe ndebera abantu batinyuka gutera umuyobozi amabuye n’imodoka y’abasirikare kandi bafite imbunda, gusa ahubwo nuko umukobwa umwe atukisha bose twese twabigendeyemo kandi byarakozwe na bamwe; ubu turashonje ariko nta kundi reka dutegereze umwanzuro”.

Undi witwa Medard utaratangaje irindi zina rye, wemera ko yikundira agatama ati “Dusigaye tujya kunywera mu birometero byinshi kubera icyaka”.

Akomeza agira ati “Nibadukingurire naho abarwana n’abaterana amabuye bafungwe naho twebwe tujya kwiyicira akanyota batureke”.

Murego Richard, Umunyamabanga Nshingwabikorwa w’Umurenge wa Gitoki yatangaje ko impamvu yo gufata umwanzuro wo gufunga utu tubari ari urugomo rukabije abanywera muri aka gasantere bafite, ku buryo ngo akenshi barwana bakavushanya amaraso.

Ati “Aba baturage bakoresha inzoga zitemewe mu gihugu cyacu kandi bakarara banywa batitaye ku masaha ibyo bikabaviramo guhora mu ntambara zidashira bakarwana bakavushanya amaraso abandi bagakubita abagore babo”.

Gitifu Murego avuga ko nawe bamuteye amabuye, ati “Baje kuntera amabuye ndi mu modoka bamenera ikirahure, ibyo byarabaye ndabyirengagiza nk’umubyeyi”.

Ngo bageze n’aho batera imodoka ya gisirikare amabuye, hahita hafatwa umwanzuro wo gufunga utubari.

Murego ati “Ntibyatinze ni bwo bateraga amabuye imodoka ya gisirikare mu kwezi gushize nayo bayimena ibirahure, bituma dufata umwanzuro n’ubuyobozi bw’Akarere kuba utu tubari twafungwa”.

Murego Richard akomeza avuga ko u Rwanda rutakwihanganira ibikorwa by’urugomo biteza umutekano muke, ngo kabone n’ ubwo utwo tubari twaba twinjiriza amafaranga menshi igihugu binyuze mu misoro.

Murego avuga ko utu tubari tutafunzwe burundu, ngo ahubwo ni akanyafu.

Ati “Kariya ni akanyafu kuko ejo kuwa kabiri tariki 12 Kanama hazaba inama y’umutekano n’abaturage ni bwo tuzamenya igihe tugomba kubafungurira, ariko ibyo bikorwa by’urugomo nibikomeza tuzafata imyanzuro ikaze kurusha iyo twari twafashe”.

Agasantere ka Nyamirama gaherereye mu Murenge wa Gitoki, Akarere ka Gatsibo, Intara y’Iburasirazuba, hakaba harafunzwe utubari dukabakaba 15 muri rusange.

Email: [email protected]