Umuhango wo kwibuka ku nshuro ya gatanu imiryango yazimye muri jenoside yakorewe Abatutsi mu Rwanda wabereye mu Karere ka Gatsibo ahibutswe imiryango igera kuri 86 yo muri ako Karere yazimye muri Jenoside. Minisitiri w’umuco na Siporo Protais Mitali yibukije ko kwibuka imiryango yazimye burundu binyomoza abagipfobya Jenoside bakigaragara hirya no hino kw’isi.

Uyu muhango wo kwibuka ku nshuro ya gatanu imiryango yazimye muri jenoside yakorewe Abatutsi mu Rwanda wabimburiwe n’urugendo rwahereye Kiramuruzi ahahoze ari Komini Murambi yayoborwaga na Burugumesitiri Jean Baptiste Gatete wateguye akanayobora Jenoside yakorewe Abatutsi muri ako gace.

Nyuma y’urwo rugendo hashyizwe indabo ku Rwibutso rwa Kiziguro rushyinguyemo imibiri y’abazize Jenoside bagera ku bihumbi 14.000.

Iki gikorwa cyo kwibuka imiryango yazimye muri Jenoside yakorewe Abatutsi mu Rwanda cyateguwe n’Umuryango ry’abanyeshuri bacitse ku icumu barangije amashuri makuru naza Kaminuza GAERG. Uyu mwaka hibutswe hazirikanywe ku nsanganyamatsiko igiri iti «Ntukazime nararokotse»

Mu buhamya bwatanzwe na Padiri Rutinduka Laurent umwe mu baharokokeye, yatanze ubuhamya ku mateka yaranze jenoside mu cyahoze ari Komini Murambi n’uburyo butandukanye bwakoreshejwe mu kwica Abatutsi muri kariya gace kuko bitakozwe muri 94 gusa ahubwo byari byaratangiye cyera biza gusozwa na Burugumesitiri Jean baptiste Gatete aho yari yaratoje interahamwe 150 muri buri murenge mu mirenge 14 yari igize iyo Komini Murambi, zikaba arinazo zanamufashije gukora Jenoside hicwa Abatutsi 14,000 mu gihe gito.

Umwihariko wa Jenoside yakorewe Abatusi mu cyahoze ari Komini Murambi ngo nicyo cyatumye hategurwa kubera uyu muhango wo kwibuka imiryango yazimye ku nshuro ya 5 nk’uko byasobanuwe na Habonimana Charles uyobora umuryango GAERG, gusa ngo iki gikorwa kimaze gukorwa mu Turere turindwi kandi uko imyaka igenda niko amakuru y’iyi miryango yazimye ashobora asibangana burundu akaba yasabye ko baterwa inkunga bigakorwa mu turere twose.

Perezida wa IBUKA Dr Jeans Pierre Dusingizemungu yasabye ko amatekaya jenoside yakorewe Abatutsi yo mu cyahoze ari Murambi yakwandikwa ntazasibangane, yasabye ko bahereye no ku gitabo cyanditswe na Padiri Rutinduka ko nacyo kwandikwa no mu zindi ndimi, dore ko kugeza ubu icyo gitabo cyanditse mu Kinyarwanda gusa kugirango n’abanyamahanga bajye babisoma.

Minisitiri w’Umuco na Siporo Protais Mitali uretse gushimira umuryango GAERG wateguye ibikorwa byo kwibuka imiryango yazimye, yasabye ko kuva kwibuka bibera mu midugudu ku bufatanye n’inzego z’ibanze n’abaturage hashakishwa uko amakuru ataraboneka.

Uyu muhango kandi waranzwe no gucana urumuri rw’icyizere no gusoma amazina y’imiryango yazimye mu Karere ka Gatsibo bikurikirwa n’ijoro ryo kwibuka. Kugeza ubu mu Turere turindwi tumaze gukorerwamo igikorwa cyo kubarura imiryango yazimye muri Jenoside yakorewe Abatutsi habarurwa imiryango 5631 yazimye yari irimo abantu 21 984. Mu Karere Gatsibo honyine habarirwa imiryango 86 yazimye yari igizwe n’abantu 366 bazize Jenoside.

Uyu muhango wo kwikuka imiryango yazimye muri Jenoside yakorewe Abatutsi mu Rwanda wanakorewe I Ntarama mu mwaka wa 2009, I Murambi mu ntara y’amajyepho muri 2010, 2011 ukorerwa kuri stade Gatwaro, ku nshuro ya kane ukorerwa ku rwibutso rwa Nyanza ya Kicukiro, naho ku nshuro ya gatanu uyu muhango wabereye mu Murenge wa Kiziguro mu Karere ka Gatsibo.

Orinfor