Gen Kabarebe yahishuye ibyafashije RPA gutsinda ingabo zirimo n’iz’amahanga zahurujwe na Habyarimana

Yanditswe na Twarabanye Venuste
Kuya 11 Nyakanga 2020 saa 10:06
Yasuwe :
0 0

Umujyanama wa Perezida Kagame mu by’umutekano, Gen. James Kabarebe, yavuze ko gukunda igihugu n’ubuyobozi bwiza, byabahaye imbaraga ziruta intwaro z’abo bari bahanganye barimo n’abahurujwe na Perezida Habyarimana.

Gen. James Kabarebe yabigarutseho mu kiganiro ku Kwibohora, cyahuje bamwe mu bayobozi n’Abanyarwanda baba muri Aziya, mu Burasirazuba bwo hagati na Pasifika.

Yavuze ko nubwo abanyarwanda bari bamaze imyaka igera muri 30 hanze y’igihugu, aho bari hose mu bihugu bitandukanye bakomeye ku muco, bagakomeza gukunda u Rwanda ndetse bigatozwa n’abakiri bato.

Yatanze urugero rw’aho ubwo mu gihugu yarimo we na bagenzi be bagiye gufana Amavubi yaje gukina n’icyo gihugu kandi ari abasirikare bacyo.

Ati “Twakundaga u Rwanda pe!. Nubwo twabaga mu bihugu byari biducumbikiye ndibuka rimwe mu gihugu njye nabagamo Amavubi yaje gukina n’ikipe y’igihugu y’icyo gihugu kandi twe twitwaga ko turi abasirikare b’ingabo z’icyo gihugu ariko twarikoze tujya ku kibuga dufana Amavubi mu buryo bugaragara. Twumvaga Amavubi ari igihugu cyacu ari u Rwanda, dufana kandi tutakibamo tutanagikorera.”

Ubwo burere bwo gukunda igihugu ariko n’akababaro ko kutagira igihugu ni byo byatumye urubyiruko rwitabira urugamba n’ababyeyi bakohereza abana babo nta ngingimira.

Ati “Gutera igihugu birumvikana birakomeye cyane. Twaheraga ku mutima twari dufite, mu by’ukuri njye abo nabonye b’urubyiruko twazanye n’abandi baje badusanga, bose wabonaga bafite umutima ariko ntawari witeze icyo ari buhure nacyo imbere.”

Ku rundi ruhande nubwo bose bahagurukanye umutima ushyize hamwe nta wari witeze ibyo bazahurira nabyo ku rugamba. Leta ya Habyarimana yahuruje imihanda yose haza ingabo zikomeye n’intwaro nyinshi na zo zikomeye.

Imitwe ikomeye y’Ingabo z’Abafaransa, iz’Ababiligi n’izaturutse mu mutwe urinda umukuru w’igihugu muri Zaïre zabakoraniyeho bituma Inkotanyi zitakaza ingabo nyinshi ku ikubitiro, ariko ntabwo byabaciye intege.

Ati “Ntanze nk’urugero twateye itariki ya 1 Ukwakira 1990 ariko itariki 4 iminsi ine nyuma yaho Abafaransa bavuye mu birindiro byabo muri Centrafrique umutwe wabo w’abakomando uza gutabara ingabo za leta twarwanaga nazo. Bukeye itariki 5 Ababiligi baraje, bukeye Mobutu wa Zaïre yohereje umutwe w’ingabo urinda umukuru w’igihugu kuturwanya n’ibikoresho bihambaye tutari dufite ari nayo mpamvu ku ikubitiro twapfushije abasirikari benshi n’abayobozi benshi ariko ibyo ntabwo byaciye abayobozi intege kubera ko twari dufite umutima wo gukunda igihugu no kucyitangira ndetse harimo no kumena amaraso.”

Ubuyobozi bwiza muri urwo rugamba ngo ni intwaro ikomeye yabafashije kurutsinda na nyuma yarwo ibafasha gushyiraho icyerekezo cyo kubaka u Rwanda. Gen. Kabarebe yavuze ko ubuyobozi bwiza bwabahaga imbaraga ziruta iz’intwaro n’abo bari bahanganye nabo.

Ati “Ikindi cyadufashije cyane ni ubuyobozi. Buriya ubuyobozi ni intwaro ikomeye cyane mu rugamba rwose umuntu yarwana rwaba urw’amasasu rwaba urwo kubaka igihugu kuko hari ibyemezo bigomba gufatwa, icyerekezo kigomba gufatwa kandi uruyoboye akacyerekezamo n’abo ayoboye akanakibumvisha bakacyumva. Kuba rero twaragize ubuyobozi bwiza nubwo twahuye n’ibyo bibazo yabaye intwaro ikomeye cyane ku buryo ubuyobozi bwiza bwaduhaga imbaraga ziruta iza biriya bikoresho n’abo twarwanaga nabo.”

Urugamba rwo kubohora igihugu rwatangiye ku itariki ya 1 Ukwakira 1990. Kuri iyo tariki nibwo ingabo zari iza FPR Inkotanyi, APR, zagabye igitero ku mupaka wa Kagitumba kiba ikimenyetso gikomeye cy’urugamba rwo kubohora igihugu binyuze mu nzira y’intambara.

Uwo munsi Gen Maj Fred Gisa Rwigema wari uyoboye uru rugamba yasobanuriye abari biyemeje kubohora igihugu ko akazi kabo kagomba ubwitange, ababwira ko abafite ubwoba basubira inyuma hakiri kare kuko intambara yari itangiye ikomeye kandi ko batagomba kwibeshya ko hari abandi bazayibafasha atari Abanyarwanda ubwabo.

Gen Kabarebe (iburyo), Minisitiri Dr Biruta Vincent n'umunyamakuru Mukamabano Gloria mu kiganiro ku Kwibohora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .