Ubu butumwa babuhawe na Minisitiri w’Ingabo, Gen Kabarebe James, ubwo yawutahaga ku mugaragaro.
Umudugudu w’Icyitegerezo wa Bahimba watangiye kubakwa muri Mutarama 2017. Wuzuye utwaye asaga miliyari imwe na miliyoni magana abiri z’amafaranga y’u Rwanda
Abawutujwemo bagaragaje akanyamuneza kuko bakuwe mu manegeka bagatuzwa aheza.
Nyirabarihira Ancilla yashimiye ubuyobozi bw’igihugu bwabazirikanye ashimangira ko ibyo yagejejweho bizamufasha guhindura icyiciro cy’ubudehe.
Ati “Nari mu cyiciro cya mbere cy’ubudehe ariko nkivuyemo ngiye mu cya kabiri. Nzabigeraho mbikesha amahirwe y’iterambere negerejwe. Twari dutuye ahantu habi turi mu bukene ariko twatujwe aheza hari umuriro, amazi, amashuri n’ibindi. Bigiye kudufasha kwiteza imbere. Nanjye ngiye guharanira gukora cyane.”
Gen Kabarebe yasabye abaturage bawutujwemo kuwufata neza no kubakira ku mahirwe awurimo.
Yagize ati “Inzu mwahawe musabwe kuzifata neza. Hari aho byagiye bigaragara ko hari abahabwa inzu ejo ugasanga bazisambuye bari kugurisha. Mwahawe umudugudu mwiza ufite byose bikenerwa ngo mubihereho.’’
Yashimangiye ko igihugu gifite ibikenewe ngo abagituye biteze imbere, bityo ‘iyi ni intambwe yo kubafasha kugera kure. Muhawe amashuri abanyeshuri bazigamo, mugiye korora mufite n’amahirwe menshi cyane. Mubihereho mwiteza imbere. Mukure amaboko mu mufuka mukore mugire icyo mwimarira.”
Umuyobozi w’Akarere ka Rubavu, Habyarimana Gilbert, yavuze ko umudugudu ari igisubizo kuko ibikorwa remezo biwurimo bizagera kuri benshi.
Yatanze urugero ku ivuriro rizafasha abatuye muri Nyundo n’ishuri ry’imyaka ine rigiye kwifashishwa mu kugabanya ubucucike bw’abanyeshuri biga mu bigo bitandukanye byegereye Bahimba.
Yijeje ko bidatinze abawutuyemo bazaba bafite icyumba mberabyombi kizabafasha kwidagadura, isoko ribafasha mu buhahirane n’umuhanda mwiza.
Umudugudu w’Icyitegererezo wa Bahimba wuzuye muri Kanama 2018. Wubatswemo inzu 12 aho imwe iturwamo n’imiryango ine. Ku ikubitiro hatujwemo imiryango itishoboye n’indi yakuwe mu manegeka igera kuri 48.
TANGA IGITEKEREZO