Mu kiganiro yahaye abanyeshuri 455 bo mu Ishuri Rikuru rya Gisirikare i Gako kuwa Kane, tariki ya 11 Kamena 2015, Gen. Nyamvumba yababwiye ko bagomba kuba bazima ku mubiri no mu bitekerezo.

Yagize ati“Nk’abayobozi b’ejo mugomba guhora mwibuka aho mukorera uko hameze…mugomba kuba bazima mu bitekerezo no ku mubiri."

Umugaba Mukuru w’Ingabo z’u Rwanda, Gen.Patrick Nyamvumba imbere y'abanyeshuri

Yakomeje abwira ko kuba umwofisiye bijyana n’inshingano, ko bagomba kugira ubushobozi ku giti cyabo ndetse n’inzego bayobora.

Umugaba Mukuru w’Ingabo z’u Rwanda yabaganirije ku gisirikare bagiye kwinjiramo, indangagaciro zacyo, ku nshingano zacyo ndetse n’amateka y’igisirikare cyabohoye u Rwanda, abasaba kugira indangagaciro z’ingabo z’u Rwanda zirimo gukunda igihugu,gutsinda, ubupfura,kwitanga,kunoza ibyo bakora,ubunyangamugayo no kugira umutima wo gukorera igihugu biganisha ku ntego.

Aba basirikare bahabwa inyigisho zibategurira kuba abofisiye ni 455 bakaba bagomba kumara umwaka bategurirwa kwinjira mu ngabo z’u Rwanda.