00:00:00 IGIHE NETWORK KN KINYARWANDA EN ENGLISH FR FRANCAIS

Gisagara: RIB yakirijwe akababaro k’abagabo bakubitwa n’abagore babo bakanabahohotera

Yanditswe na Prudence Kwizera
Kuya 13 Nzeri 2021 saa 08:36
Yasuwe :
0 0

Urwego rw’Igihugu rw’Ubugenzacyaha, RIB, rwasuye abaturage bo mu Murenge wa Mamba mu Karere ka Gisagara bagaragaza ko hari ikibazo cy’abagabo bakubitwa n’abagore babo bakanabahohotera.

Ni muri gahunda RIB imazemo iminsi mu Ntara y’Amajyepfo yo kwegera abaturage no kumva ibibazo byabo, by’umwihariko bibanda ku cyaha cyo gusambanya abana n’ihohoterwa rishingiye ku gitsina.

Ubwo bageraga mu Kagari ka Gakoma mu Murenge wa Mamba kuri uyu wa Mbere, abaturage bagaragaje ko hari ikibazo gikomeye cy’abagore bakubita abagabo babo, ariko abagabo bakagira ipfunwe ryo kujya kubarega.

Abagore ni bo babanje kugaragaza icyo kibazo, basaba ubuyobozi na RIB kucyitaho kuko ingo nyinshi zo muri ako gace zihoramo amakimbirane.

Umwe mu bagore yagize ati “Inama dufite ikibazo gikomeye cy’abagore birirwa banywa inzoga bamara gusinda bagataha bakubita abagabo babo. Abagabo batinya kujya kubivuga kuko banga ko babita inganzwa, ariko ni ikibazo gikomeye kiri gutuma ingo zihoramo amakimbirane.”

Undi mugabo witwa Urayeneza Emmanuel yahise asaba ijambo na we agaragaza ko icyo kibazo gihari, atanga urugero rwa mugenzi we uheruka gukubitwa n’umugore amukomeretsa ku gahanga ajya mu bitaro.

Ati “Uwo mugabo ubu aryamye mu nzu kuko umugore yamukubise ibuye ku gahanga. Akimara kumukomeretsa impanga yagiye mu bitaro, ejo yavuyeyo none aryamye mu rugo.”

RIB yabajije inzego z’ibanze mu Kagari ka Gakoma niba icyo kibazo bakizi, abayobozi basubiza ko batakizi kuko abagabo iyo bakubiswe bahitamo kubihisha.

Byabaye ngombwa ko bajya muri urwo rugo basanga koko ni ko byagenze, maze uwo mugore ahita atabwa muri yombi. Kuri ubu afungiye kuri Sitasiyo ya RIB ya Mamba.

Abagore n’abagabo batuye mu Murenge wa Mamba basabye ijambo, bose bahurije ku kibazo cy’uko abagabo basigaye bahohoterwa kandi hari n’ababigaragariza ubuyobozi ntibyitabweho.

Nyirarukundo Solange ati “Ikibazo dufite inaha ni icy’abagore birirwa mu tubari basinda bagataha barwana bakubita abagabo. Nta mugore ugifungwa ngo ahanwe kuko yahohoteye umugabo ahubwo abagabo ni bo bafungwa gusa.”

Undi mugabo yasabye ko hakwitabwa no gushyiraho amategeko arengera abagabo nk’uko hashyizweho arengera abagore ariko RIB imwibutsa ko itegeko rihana buri wese hatarebwe igitsina.

Umukozi wa RIB mu Ishami rishinzwe gukumira Ibyaha, Ntirenganya Jean Claude, yagiriye inama abagabo bahohoterwa kujya batinyuka bakabivuga kugira ngo bikemurwe hakiri kare.

Ati “Iyo twamagana ihohoterwa rishingiye ku gitsina ntituvuga ko ari umugabo uhohotera umugore gusa, n’umugore ahohotera umugabo, kandi bose amategeko abahana kimwe. Niba rero mwatangiye kubivuga ikibazo kigiye gukemuka, mukomeze mutinyuke mubivuge.”

Abaturage bo mu Kagari ka Gakoma bagaragaje ko hari abagabo bahohoterwa bagahitamo guhunga ingo zabo, abandi bakiyahura.

Mu byaha 134 bimaze kugaragara mu Murenge wa Mamba kuva muri Mutarama kugeza muri Nzeri 2021, ibyo gukubita cyangwa gukomeretsa ku bushake ni 58.

Umukozi muri RIB mu Ishami rishinzwe gukumira Ibyaha, Ntirenganya Jean Claude, yagiriye inama abagabo bahohoterwa kujya batinyuka bakabivuga kugira ngo bikemurwe hakiri kare
Umuyobozi wa RIB mu Ntara y’Amajyepfo, Kamarampaka Consolée, yasabye abaturage kwirinda ibyaha
Abaturage basabwe kujya batanga amakuru kugira ngo ibyaha bikumirwe bitaraba
Abaturage bo mu Murenge wa Mamba bagaragaje ko abagabo basigaye bahohoterwa n'abagore babo
Hari hateguwe aho abafite ibibazo by'ihohotera rishingiye ku gitsina ndetse no gusambanya abana babitangira
Mu Karere ka Gisagara RIB yakirijwe akababaro k’abagabo bakubitwa n’abagore harimo n’uherutse gukomeretswa ku gahanga
RIB imaze iminsi mu Ntara y’Amajyepfo muri gahunda yo kwegera abaturage no kumva ibibazo byabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .