Mu kigo cy’amashuri “Green Hills Academy” giherereye mu Mujyi wa Kigali, hizihijwe isozwa ry’icyiciro cy’amashuri yisumbuye ku banyeshuri 52, kuri uyu wa 01 Kamena 2013.

Aba banyeshuri bahabwa amasomo asanzwe, bakanakurikira amasomo mpuzamahanga muri porogaramu yitwa “ International Baccalaureate Program” (IB), abafasha kwimenyereza kuvugira mu ruhame, akanabategura kuba abayobozi beza b’ahazaza ndetse akabategura gukomeza amasomo yabo muri za kaminuza hirya no hino ku isi.

Umufasha w’Umukuru w’Igihugu, Madamu Jeannette Kagame yifurije amahirwe abanyeshuri barangije icyiciro cy’amashuri yisumbuye, abashishikariza gukomeza kongera ubumenyi bafite no kwitwara neza muri za kaminuza zitandukanye bitegura kujyamo. Ati “Abana bacu tubahaye impundu.Turabashishikariza gukomeza gutyaza ubwenge. Nta kizababuza kugera ku nzozi zanyu. Mukoreshe “Facebook” na “Twitter” mu buryo bwiza. Aho muzajya hose mujye mwibuka aho muva.”

Madamu Jeannette Kagame yishimiye ko iki cyiciro cyarimo abakobwa benshi ugereranije no mu bihe bya mbere, aho wasangaga mu burezi abakobwa bitabiraga ari bake. Ashimangira ko amahirwe mu burezi ari amwe ku bahungu n’abakobwa.

Yashimiye abarezi muri iri shuri n’ababyeyi bagize uruhare mu gukurikirana abana kugeza uyu munsi.

Prof. Anastase Shyaka umuyobozi w’Ikigo cy’Igihugu cy’Imiyoborere wabatozaga kuba abayobozi beza, yabashishikarije gukomeza kwiremamo icyizere bagatera intambwe idasubira inyuma, ndetse bagakomeza ibikorwa by’urukundo n’imyitwarire myiza bagaragaje ko bafite.

Bamwe muri aba banyeshuri bavuga ko ubuzima bwo hanze butoroshye ariko bafite icyizere cyo kububamo nk’uko Ines Giramata abivuga. Ati “Porogaramu ya IB yaduteguye uburyo bwo kubaho mu buzima busanzwe, ababyeyi bacu na bo batwigishije imyitwarire myiza ikwiye kuturanga. Mu gihe naba ndi kure yabo nzarushaho kwitwara neza ngo mbashimishe.”

Abararangije iki cyiciro barimo abahungu 22 n’abakobwa 30, bakomoka mu bihugu bigera kuri 12 birimo u Rwanda, Tanzania, Kenya, Nigeria, u Budage, u Buhinde n’ibindi. Bagize uruhare mu bikorwa bitandukanye birimo iby’urukundo nko gufasha imfubyi zo mu Karere ka Kamonyi n’ahandi.

Green Hills Academy ni ishuri ry’ababyeyi riherereye mu Mujyi wa Kigali, ryashinzwe mu mwaka wa 1997. Rifite icyiciro cy’incuke, icy’amashuri abanza n’ayisumbuye, bahabwa amasomo mu ndimi z’Igifaransa, Icyongereza, Ikidage n’Ikinyarwanda.

Mu mashuri yisumbuye abanyeshuri bategurwa gukora ibizamini mpuzamahanga n’abarimu b’inzobere baturuka mu bihugu bitandukanye ku isi. Abitegura gusoza umwaka wa Gatandatu bakurikirana “International Baccalaureate Programme” (IB) mu Rwanda iboneka muri Green Hills Academy gusa.

Madamu Jeannette Kagame ageza ashimira abanyeshuri basoje amasomo muri Green Hills Academy

Abitabiriye ibirori umunezero wari wose

Madamu Jeannette Kagame ashimira abana basoje amasomo

Madamu Jeannette Kagame mu ifoto y'urwibutso n'abanyeshuri basoje amasomo mu cyiciro cya kabiri cy'amashuri yisumbuye muri Green Hills Academy

Prof Anastase Shyaka ageza ijambo ku bitabiriye ibirori by'abana basoje amasomo y'icyiciro cya kabiri cy'amashuri yisumbuye muri Green Hills Academy

Abana bashima amasomo n'impanuro baherewe muri Green Hills Academy