Mu gihe habura amasaha macye ngo Umugenzuzi Mukuru w’Imari ya Leta atangaze raporo y’igenzura ry’umwaka w’imari 2012/2013, gahunda irabera mu Nteko Ishinga Amategeko imitwe yombi saa cyenda zuzuye kuri uyu wa Mbere, asanga gahunda yo gukurikirana abakoresha nabi umutungo wa leta igenda neza.

Mu kiganiro yagiranye na Newtimes dukesha iyi nkuru, Obadiah Biraro Umugenzuzi Mukuru w’Imari ya Leta yatangaje ko muri rusange ibijyanye no gukurikirana abangiza umutungo wa leta igenda neza. Ibi akabivuga agereranije raporo aratanga uyu munsi ndetse n’izayibanjirije.

Obadih Biraro avuga ko ibibazo byagaragajwe muri raporo y’ubushije, ni ukuvuga iy’umwaka w’imari wasojwe tariki ya 30 Kamena umwaka ushize, byakurikiranwe neza.

Ati: “Tugereranije, 60 ku ijana by’ibibazo twagaragaje muri raporo y’ubushize byakurikiranwe neza ndetse birasozwa kandi byinshi muri byo birahabwa umurongo mwiza. Ibibazo bijyanye n’ibaruramari risobanutse ndetse n’ibinyuranya n’itegeko rigenga imikoreshereze y’imari ya leta bigenda bifata umurongo mwiza”.

Biraro aboneraho gusaba minisiteri zose kongerera ubushobozi abakozi, kuko asanga benshi muri bo bakibura ubumenyi bwo gusobanukirwa agaciro k’imari ya leta cyangwa ngo babashe gukoresha gahunda y’ibaruramari ry’umwuga.

Ati: “Minisiteri zikwiriye ubu kubasha gufasha ibigo bizishamikiyeho ku bijyanye no gukurikirana imikoreshereze y’imari ya leta”.

Guverinoma y’u Rwanda yatangije gahunda yo kugenzura imikoreshereze y’imari ya leta mu mwaka wa 2000, aho igenzura rigera kuri 90 ryakozwe muri minisiteri, ibigo bya leta, intara ndetse n’uturere. Nyuma yaho mu mwaka wa 2003 ni bwo Ibiro by’Umugenzuzi Mukuru w’Imari ya Leta byashyizweho ngo hajye hakorwa raporo itabogamye ku mikoreshereze y’imari ya leta.

Hejuru ku ifoto: Obadiah Biraro, Umugenzuzi Mukuru w’Imari ya Leta