Gushyiraho uburyo buhamye bwo gufasha abatishoboye no gukurikirana uburyo bagenda biyubaka, gufasha abasigajwe inyuma n’amateka bagahuzwa n’abandi banyarwanda bafite ubukene bukabije, no kwita ku bageze mu zabukuru kugira ngo bagire amasaziro meza, ni bimwe mu byizwe mu nama yahuje Minisiteri y’Ubutegetsi bw’igihugu, iy’ubuzima n’iy’uburezi n’inzego z’ibanze hakoreshejwe ikoranabuhanga rya Video Conference.

Nk’uko tubikesha itangazo rya Minisiteri y’Ubutegetsi bw’Igihugu, ryashyizweho umukono na Ngendahimana Ladislas, Ushinzwe Itumanaho n’Imenyekanishamakuru muri iyo minisiteri, tariki 16 Ukwakira 2013 habaye inama yahuje Minisiteri y’Ubutegetsi bw’Igihugu, Minisitiei y’Ubuzima, Minisiteri y’Uburezi, Umuyobozi w’Umujyi wa Kigali, ba Guverineri b’Intara bose, abayobozi b’Uturere n’abayobozi b’Uturere bungirije bashinzwe imibereho myiza, abayobozi b’ibitaro by’Uturere bose hamwe n’abakozi bashinzwe imibereho myiza ku rwego rw’Akarere.

Inama yayobowe na Minisitiri w’Ubutegetsi bw’Igihugu, iyoborerwa ku cyicaro cy’iyo Minisiteri, abandi bose bayitabiriye banayikurikirana imbonankubone bari mu turere twabo hakoreshejwe uburyo bw’ikoranabuhanga bwa video conference.

Abayitabiriye bunguranye ibitekerezo kuri gahunda z’imibereho myiza y’abaturage, hagamijwe gusuzuma ibyagezweho no gufata ingamba zo kwihutisha iterambere, gushishikariza Abanyarwanda bose akamaro ko kwigira nk’ishingiro ryo kwihesha agaciro no kubaho neza.

Ingamba zafashwe zirimo gushyiraho uburyo buhamye bwo gufasha abatishoboye no gukurikirana uburyo bagenda biyubaka kugeza igihe bakwifasha, ndetse bagafasha n’abandi. Abasigajwe inyuma n’amateka na bo bagakomeza gufashwa muri gahunda za Leta, bahuzwa n’abandi banyarwanda bafite ibibazo by’ubukene bukabije.

Hasuzumwe kandi ikibazo cy’imibereho y’abageze mu za bukuru bagizwe incike na Jenoside yakorewe Abatutsi, kugeza ubu abamaze kubarurwa bafite ibibazo bisaba ubufasha bwihariye bakaba ari 1560. Hemejwe ingamba zihariye zo kubitaho no kubafasha kubaho neza, zirimo kububakira amacumbi ahujwe kugira ngo begerane, no kubashakira umukozi ushinzwe kubitaho, kugira ngo bagire amasaziro meza.

Ikibazo cy’imitungo y’imfubyi za Jenoside yigaruriwe n’abandi cyasuzumwe, hishimirwa ibimaze kugerwaho mu kubicyemura, ku buryo n’ibisigaye bigaragara ko bizakemurwa mu minsi ya vuba ku bufatanye n’izindi nzego bireba. Muri rusange ibibazo byose byakiriwe byari 1297, ibyakemutse burundu ni 679, ibiri mu nkiko ni 133, ibyoherejwe mu tundi turere bitakiriwemo ni 24, ibyashyikirijwe Uturere ariko hakabura abatanga amakuru yatuma bikemuka harimo n’ababitanze ubwabo ni 132, na ho ibitarakemuka kandi hari amakuru ahagije ni 331.

Hashimangiwe kandi politiki ya Leta yo kurerera abana bose mu miryango bagakurwa mu bigo by’imfubyi, no gushyiraho uburyo bwihariye bwo gukurikirana imibereho y’abo bana mu miryango yabakiriye.

Ku birebana na gahunda yo kwimura abatuye mu manegeka n’ahantu hashobora gushyira ubuzima mu kaga, Abanyarwanda bashimiwe imbaraga n’ubwitange bagaragaje muri iyi gahunda, kuko ku miryango 47.474 yagombaga kwimurwa hasigaye gusa 18.474 bonyine. Abaturage basabwe gukomeza gutanga umuganda no gufatanya n’ubuyobozi kugira ngo bikorwe neza kandi birangire vuba. Hashimangiwe kandi ko abimurwa bose bagomba gutuzwa mu midugugu yateganyijwe.

Abari mu nama bashimiye uturere twitabiriye vuba gahunda y’ubwisungane mu buzima, bigatuma impuzandengo ku rwego rw’igihugu iri hejuru ya 60%. Abanyarwanda bose basabwe kumva ko ubwishingizi bubafitiye akamaro. Hashimangiwe kandi ko umusanzu w’ubwishingizi bwo kwivuza ugomba kuba warangije gutangwa n’abanyarwanda bose bitarenze ukwezi k’Ukuboza uyu mwaka.

Hashimangiwe gahunda za Leta zo kurwanya indwara ziterwa n’imirire mibi, hitabwa cyane cyane ku bana batarengeje imyaka itanu, abagore batwite n’abonsa, hemezwa ko abazirwaye bagomba gukurikiranwa by’umwihariko kandi bagahabwa ubufasha hagamijwe kubungabunga imibereho myiza y’umwana.

Mu rwego rw’uburezi, hafashwe ingamba zo gushishikariza urubyiruko kwitabira amashuri y’imyuga n’ubumenyingiro (TVET), abo bireba bagashyiramo ibyangombwa bikenewe mu rwego rwo gushyigikira politiki y’uburezi bufite ireme, kandi bufasha abanyarwanda kwihangira umurimo.