Hari gusuzumwa imisoro ihanitse y’ubutaka imaze iminsi yinubirwa n’abaturage

Yanditswe na Ferdinand Maniraguha
Kuya 21 Ukuboza 2020 saa 05:22
Yasuwe :
0 0

Minisitiri w’Imari n’Igenamigambi, Dr Uzziel Ndagijimana, yavuze ko Guverinoma yatangiye gusuzuma ikibazo cy’imisoro y’ubutaka kimaze iminsi cyinubirwa n’abaturage, bavuga ko ihenze.

Itegeko ryatowe ku wa 2 Kanama 2018 riteganya ko umusoro ku butaka wasimbuye amahoro yishyurwaga ku butaka, uzajya utangwa ku gipimo kigenwa n’Inama Njyanama kuri metero kare, ariko icyo gipimo kikaba hagati ya 0 na 300 Frw kuri metero kare, mu gihe byari bisanzwe biri hagati ya 30-80 Frw/m2.

Muri Kamena uyu mwaka, Inama Njyanama y’Umujyi wa Kigali yemeje ko guhera mu mwaka w’ingengo y’imari wa 2020-2021, umusoro kuri metero kare y’ubutaka washyizwe hagati ya 0 na 300 Frw kuri metero kare.

Nubwo umusoro wihariye ugenwa hagendewe ku cyo ubutaka bukoreshwa, benshi mu baturage bagaragaje ko imisoro yongerewe bikabije ndetse bamwe batangira kwandika bagaragaza ko batazashobora kuyishyura.

Mu kiganiro cyahuje Perezida Kagame n’abanyamakuru kuri uyu wa 21 Ukuboza, icyo kibazo cyongeye kubazwa na Niyitanga Salton, umuturage wo mu Mujyi wa Kigali.

Yavuze ko umusoro ku mutungo utimukanwa urimo n’ubutaka wahanitswe ku buryo hari impungenge ko abaturage batazashobora kuwishyura.

Minisitiri w’Imari n’Igenamigambi, Dr Uzziel Ndagijimana, nyuma yo gusabwa gusobanura icyo kibazo, yavuze ko batangiye kugisuzuma bafatanyije n’inzego zitandukanye.

Yagize ati “Nyuma y’uko abaturage bagaragaje ko imisoro y’ubutaka ibahenze, twatangiye isuzuma ari Minisiteri y’Imari n’Igenamigambi, ari Minisiteri y’Ubutegetsi bw’Igihugu ndetse n’inzego z’ibanze. Gusuzuma ikibazo twarabitangiye ngo tubone icyakorwa ariko hagati aho hafashwe n’uburyo bwo korohereza abasora.”

Mu gihe ikibazo kigisuzumwa, Ndagijimana yavuze ko hari ibyakozwe mu korohereza abasora birimo kongera amezi atatu ku gihe abaturage bagomba kuba bishyuriye imisoro no kuborohereza kwishyura mu byiciro.

Perezida Kagame yavuze ko mu gusuzuma uwo musoro abaturage bagaragaje ko uhanitse, hazitabwa ku bintu bitandukanye ku buryo ibizashingirwaho bizaba ibibereye benshi, nubwo hari abashobora kutanyurwa.

Ati “Byumvikane ko atari ukuvuga ngo umusoro w’ubukode bw’ubutaka, abantu babonye ko batazabishobora noneho ngo tuvuge ngo tubivanyeho. Byumvikane ko ubutaka bugira ubukode. Umuntu agereranya ibintu byinshi, akareba amikoro y’abantu n’impamvu uwo musoro wagiyeho noneho tugashaka igishobora kuba cyabera benshi kurusha.”

Mu kugena agaciro k’umusoro uzajya wishyurwa n’umudugudu runaka, hashingiwe ku ngingo eshatu, zirimo icyo ubutaka bugenewe gukoreshwa, urwego rw’iterambere ruri muri uwo mudugudu ndetse n’ibikorwaremezo bihari.

Benshi mu binubira iri tegeko rishya bavuga ko leta itakagombye kuba yarashyizeho ibiciro bishya mu gihe igihugu kiri mu bihe bikomeye by’ubukungu cyatewe n’ingaruka z’icyorezo cya Coronavirus kimaze umwaka kiyogoza abatuye Isi.

Inkuru bijyanye: Sobanukirwa imiterere y’umusoro ku mutungo utimukanwa muri Kigali

Umusoro w'ubutaka ujyana n'ibiri kuri ubwo butaka. Niba uzamutse n'agaciro k'inzu iburiho karazamutse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .