Ibi ngo bizafasha abana bahura n’ibibazo bitandukanye birimo ihungabana n’ibindi bigaragara mu miryango yabo bishobora gutuma batiga neza.

Mu nama nyunguranabitekerezo yahuje abashakashatsi n’abarezi batandukanye, yabereye mu ishuri rikuru ry’Abaporotestanti PIASS mu Karere ka Huye ku wa 05 Werurwe 2015, bimwe mu bibazo byagaragaye bibera imbogamizi umwana mu myigire ye, ni ukuba yihererana ibibazo bye akabura uwo abibwira, bikaba byatuma ava no mu ishuri.

Ubuyobozi bw’Ikigo cy’Igihugu cy’Uburezi (REB) buvuga ko bugiye gukora ubuvugizi, muri politiki ya Leta hashyirwemo gahunda ko buri kigo cy’ishuri cyagira umuntu wihariye utanga inama ku myitwarire n’imitekerereze (School Psychologist).

Ibi ngo ahanini biterwa n’uko nta mukozi wihariye wabyigiye ushinzwe imyitwarire n’imitekerereze, ugomba gufasha abafite ibibazo by’ihungabana n’ibindi bishobora gutuma batiga neza bikomoka ku miryango yabo cyangwa ahandi.

Bizimana Adrien Umuyobozi w’Ishuri Ryisumbuye rya Gikonko mu Karere ka Gisagara, yatanze urugero ko ku kigo ayoboye hari umwana wigeze guhura n’ikibazo cyo kutiga neza kubera ibibazo byo mu muryango aturukamo, ariko nyuma yo kumwegera no kumuganiriza baramufasha abasha kwiga neza.

Ati “Ni umwana w’umukobwa yahoraga yigunze, ntabikoresho by’ishuri, nta namafaranga y’ishuri atanga agahora yirukanwa. Rimwe nza kumwegera ndamuganiriza nsanga afite ibibazo bikomoka mu muryango we, ababyeyi be bashaka gutandukana, twamugiriye inama tumuba hafi bituma atangira kwiga neza no gutsinda, ubu ari hafi kurangiza”.

Basanga uyu mukozi muri buri ikigo yagira akamaro gakomeye

Mu bitekerezo byatanzwe na benshi bari muri iyi nama, bifuje ko inzego zibishinzwe zashyiraho uburyo buri kigo cy’ishuri cyagira umukozi wihariye kandi wabyigiye ushinzwe kwita kubana bafite ibibazo bituma batiga neza, kuko abenshi mu barimu bagaragaje ko ibibazo nk’ibyo bigaragara, bigatuma hari n’abata ishuri ntibagaruke kwiga.

Umushakashatsi akaba n’umwari uri Kaminuza y’u Rwanda, Prof. Jean Pierre Dusingizemungu, yongeyeho ko bitewe na Jenoside yakorewe Abatutsi mu Rwanda, uyu mukozi wihariye akenewe, kuko ngo usibye gufasha abanyeshuri, hari n’ibyo yafasha n’abarimu.

Ati "Kuba harabaye Jenoside mu Rwanda na byo byongereye ubukana bw’ibibazo, ariko uwo muntu areba n’ibindi bibazo byose bishobora kuzitira umwana mu myigire. N’umwarimu ashobora kuba bafite ibyo bibazo bigatuma kubera imyifatire ye ibyo yigisha bitumvikana."

Umushakashatsi akaba n’umwari uri Kaminuza y’u Rwanda, Prof. Jean Pierre Dusingizemungu

Umugenzuzi nkomatanyaturere mu Ntara y’Uburengerazuba wari uhagarariye REB muri iyi nama, Theodore Mboneza, avuga ko bemera ko uyu mukozi akenewe kandi byafasha benshi, ariko akavuga ko bagiye kubikorera ubuvugizi ku nzego z’ibishinzwe.
Ati « Ni ikibazo gikomeye kigaragara mu mashuri yacu, icyo tugiye gukora ni ubuvugizi, bigashyirwa muri politike ya Leta. »

Bamwe mu bashakashatsi bari muri iyi nama ndetse n’abarezi bavuze ko mu gihe uyu mukozi ushinzwe gufasha abanyeshuri mu myitwarire n’imitekerereze azashyirwaho, usibye kuba byakongera ireme ry’uburezi, ngo byanatuma umubare w’abana bata ishuri ugabanuka.