Umukozi wa Minisiteri y’Imicungire y’Ibiza no Gucyura Impunzi, uyobora inkambi y’agateganyo ya Kijote mu Karere ka Nyabihu, Rwanyonga David, yatangaje kuri uyu wa Gatanu ko bavumbuye inshuro zirenze imwe abakora uburiganya kugira ngo bahabwe amadolari agenerwa impunzi.

Yagize ati “Twafunguye iyi nkambi nshya taliki 20 Gashyantare 2017 tukaba tumaze kwakira Abanyarwanda bahunguka 250 hakaba hari na 50 twasanze bafite amanyanga yo kwiyita impunzi zivuye Congo kandi ari Abanyarwanda basanzwe mu gihugu bafite n’ibyangombwa buri munyarwanda wese afite.”

Yasobanuye ko kugira ngo batahure abiyoberanyije, ari uko basanze barafashe indangamuntu, kandi amazina yabo yari asanzwe mu batahutse kera.

Ubusanzwe buri munyarwanda wese wakiriwe ari hejuru y’imyaka 18 agenerwa amadolari y’Amerika 250, naho umwana agahabwa 150 $. Aya akaba ari yo ararikirwa n’abajya muri Congo kugira ngo bagaruke bitwa impunzi.

Kubera ikoranabuhanga ryo kwandika abahunguka, Rwanyonga yizera ko abakora uburiganya bidashobora kubahira.

Yagi ati “ Guhera muri 2014 abahungutse bose tutera igikumwe ariko nk’uwahungutse mbere y’aho yaduca mu rihumye, ariko ntiyasubira kuko ntibyamukundira kubera ko yava hano twamufashe igikumwe, yahawe n’indangamuntu.”

Imodoka zicyuye Abanyarwanda zibakuye muri Congo

Zimwe mu mpunzi zakiriwe i Rubavu ziturutse muri Congo