Ikigo Hope Kids Academy cyakoze urugendoshuri ku n’ibirindiro bikuru no mu ishami rishinzwe gutabara habayeho inkongi y’umuriro, mu buryo bwo gusobanurira abanyeshuri akamaro k’ishingano za Polisi.

Iki kigo giherereye i Nyarutarama gifite mu mihigo yacyo guteza imbere imibereho y’abanyeshuri yaba iyo mu ishuri cyangwa se ubumenyi rusange.

Icyari kigambiriwe muri uru rugendo cyane ni ukwereka abanyeshuri biga muri kiriya kigo akamaro ko gutabara, gukurikiza inshingano ndetse no gusobanukirwa byimazeyo amashami abiri atabara ari muri Polisi.

Uru rugendoshuri rwitabiriwe n’abanyeshuri bose n’ikipe y’abarimu bari babaherekeje. Bazengurukijwe ibirindiro bikuru bya Polisi y’u Rwanda basura n’ibikorwa by’ishami rishinzwe kurwanya inkongi z’umuriro mu gihugu.

Mu byo beretswe harimo impuzankano ya Polisi, ibibuga byo kwitorezamo, imodoka ndetse babashije kwibonera kizimyamwoto, hamwe n’imyambaro yambarwa mu bihe byo kuzimya ahibasiwe n’inkongi y’umuriro.

Mu biganiro aba bana b’abanyeshuri bagiranye n’abarimu babo ndetse n’aba polisi yabasobanuriraga, batangaje ko basobanukiwe n’akamaro ka polisi mu gutabara ndetse n’akamaro bifitiye Umujyi wa Kigali.