Abarimu ba Kaminuza y’u Rwanda, Ishami rya Huye basobanuriye abanyeshuri uburyo filimi ya BBC” Rwanda’s Untold Story” ipfobya Jenoside yakorewe Abatutsi mu rwego rwo kuzirikana ku nshuro ya 66 umunsi w’ishyirwaho ry’amasezerano mpuzamahanga yo kurwanya Jenoside.

Abarimu bo muri kaminuza y’u Rwanda bazobereye mu by’amateka, muri politike no mu mategeko basabye abanyeshuri kwandika amateka y’igihugu cyabo kuko aribo bayazi neza kurusha abandi.

Bamwe mu banyeshuri bo muri Kaminuza y’u Rwanda ishami rya Huye bakurikiranye ibyo biganiro, babwiye IGIHE ko bagiye gutanga umusanzu wabo mu kuvuga amateka y’ukuri ku Rwanda barwanya n’uwashaka kuyagoreka.

Akingeneye avuga ko yasobanukiwe neza n’icyo abakoze filimi Rwanda’s Untold Story bari bagamije.

Ati:” Nta kindi ni ugupfobya Jenoside no guharabika u Rwanda. Icyo bidusigira nkatwe abanyeshuri turi intiti, ni uko ari twe tugomba guhindura sosiyete, tugiye kubwira ukuri abatabashije kugera ahangaha, turushaho gukosora no kubabwira ukuri”.

Ibitekerezo byatanzwe n’abanyeshuri bakurikiye ibiganiro byibanze ko Abanyarwanda bagomba gushyira hamwe bakamagana umuntu wese washaka kugoreka amateka agamije kongera gucamo abanyarwanda ibice cyangwa kubasenyera igihugu.

Umwarimu wigisha ibijyanye na politiki n’amateka muri kaminuza y’u Rwanda, akaba n’umwe mu batanze ibiganiro, Dr Charles Kabwete Mulinda, asanga kuganira n’abanyeshuri bakungurana ibitekerezo ku cyakubaka u Rwanda ari umusanzu ukomeye.

Ati: “ibyo twaganiriye byakosoraga amateka nkuko avugwa, abanyeshuri nabo tubasaba ko babwira abandi ukuri kuko hari aho bagera twe tutagera”.
Ubuyobozi bwa kaminuza y’u Rwanda ishami rya Huye nabwo bushimangira ko abanyeshuri biga muri Kaminuza ari bo mbaraga zikomeye m ugusobanura amateka y’u Rwanda uko ari, hakabeshyuzwa ibivugwa ku Rwanda bitari ukuri.

Tariki ya 24 Ukwakira 2014 , Ikigo cy’Igihugu cy’Ubugenzuzi bw’imwe mu Mirimo ifitiye igugu akamaro, RURA cyafashe icyemezo cyo kuba gihagaritse by’agateganyo ibiganiro bya BBC byo mu rurimi rw’Ikinyarwanda, hashingiwe ku birego ivuga ko yagejejweho n’abantu batandukanye bashinja BBC amagambo abiba urwango kandi ahakana Jenoside yakorewe Abatutsi.

Ibi biganiro byabereye muri Kaminuza y’u Rwanda ishami rya Huye bizakomereza ku ishami ryayo rya Kigali kuri uyu wa 10 Ukuboza.