Huye: Imiryango ikora isanamitima yahurijwe hamwe ihana ubunararibonye ku komora ibikomere

Yanditswe na Prudence Kwizera
Kuya 30 Ukwakira 2019 saa 07:56
Yasuwe :
0 0

Ikigo cy’ubushakashatsi ku mahoro n’iterambere rirambye mu Ishuri Rikuru ry’Abaporotesitanti, PIASS, cyahurije hamwe imiryango yomora ibikomere n’iharanira amahoro kugira ngo bashyireho uburyo bwiza bw’imikoranire no guhana ubunararibonye mu byo bakora.

Ni nyuma y’uko ubushakashatsi bwakorewe muri Sierra Leone mu mwaka wa 2014 bugaragaje ko gukora ibikorwa byo kubaka amahoro hatitawe ku komora ibikomere abantu bafite; uretse kudafasha abo bantu ahubwo binabangiza.

Abagize iyo miryango igera kuri 14 bahuriye mu nama mpuzamahanga y’iminsi itatu bungurana ibitekerezo k’uko barushaho kunoza ibyo bakora.

Yateguwe n’Ikigo cyo kubaka amahoro (CRASPD) cy’Ishuri cya PIASS mu Karere ka Huye kuva ku wa 27 kugeza ku wa 29 Ukwakira 2019.

Umukozi wa PIASS ushinzwe gahunda y’amahoro, Floriane Niyungeko, yasobanuye ko iyo nama mpuzamahanga bayiteguye bagamije guhuza imbaraga no gusangira ubumenyi n’ubunararibonye kugira ngo babashe kunoza ibyo bakora.

Ati “Twabahuje tugamije ko bamenyana, kuko ibyo bakora birakenerana kuko ntiwakubaka amahoro abantu bafite ibikomere ntiwanakiza ibikomere utarimo ushaka kubaka amahoro birajyana kandi iyo abantu bamenyanye imikoranire irushaho kuba myiza umusaruro batanga ukiyongera.”

Imwe mu miryango yitabiriye iyo nama ni Associtaion Modeste et Innocent (AMI); ARCT-Ruhuka; Mental Health Dignity Foundation (MHDF); Never Again Rwanda; Healing and Rebuilding Our Communities, HROC n’iyindi.

Impuguke mu bijyanye n’isanamitima ikomoka mu gihugu cya Canada, Duke Dushscherer, yabasangije uburyo bwiswe ‘Restorative Dialogue’ bukoreshwa henshi mu komora ibikomere.

Ni uburyo bwakoreshejwe bwa mbere mu gihugu cya Bresil ndetse bukaza gukoreshwa mu bice bitandukanya by’isi ahagiye haba intambara zitandukanye zatumye abaturage bagirana ibibazo.

Abusobanura yagize ati “Ubu buryo ni uguhuriza hamwe abagiranye ibibazo mu buryo bubafasha kumvana neza; abagize nabi bakumva uburyo bababaje bagenzi babo bakabasaba imbabazi. Iyo bababariranye bituma habaho ubwiyunge no kongera kubana neza batishishanya.”

Duke Dushscherer yashimye intambwe u Rwanda rwateye mu komora ibikomere by’abaturage nyuma ya Jenoside yakorewe, avuga ko na we hari byinshi yigiye muri iyo nama.

Uwari uhagarariye HROC, Maniraguha Solange, yavuze ko yungutse ko gutega amatwi umuntu ufite ibikomere no kumuha umwanya bimufasha kubikira.

Ati “Icyo nungutse ni uko umuntu wese n’ubwo twaba dufitanye ikibazo aba afite impamvu imusunika kugira ngo tugirane cya kibazo; afite icyo akeneye atari yabona, kandi twemera ko mu kuvuga umuntu wese ufite igikomere niyo habayeho kumutega amatwi arakira.”

Umukozi mu muryango AMI, Uwizeye Jean de Dieu, yavuze ko nabo basanzwe bakora ibikorwa byo komora ibikomere ariko yungukiye byinshi muri iyo nama akaba agiye kubisangiza bagenzi be.

Ati “Uburyo bwa restorative dialogue nabukunze cyane; ni uburyo bugufasha kumenya ko iyo umuntu akugiriye nabi ushobora kubanza kumenya ikibimuteye ukamenya icyo akeneye.”

“Umuntu ashobora kugukosereza ariko wowe ukamenya ko agukeneye ahubwo ukamutabara aho kumugirira nabi, aho umuntu ashobora kuvuga nabi ntiwihutire kumva ko yavuze ijambo ribi ahubwo ukareba ikiri inyuma y’iryo jambo.”

Abahuriye muri iyo nama bemeranyije ko izajya iba buri mwaka mu rwego rwo kureba aho bageze bashyira mu bikorwa ibyo bemeranyijeho no gufata ingamba.

Imiryango 14 ikora isanamitima yahurijwe hamwe muri PIASS mu nama mpuzamahanga y'iminsi itatu
Iyo nama mpuzamahanga yari igamije kurebera hamwe uko ibikorrwa byo kubaka amahoro byajyana no komora ibikomere
Wari umwanya wo kungurana ibitekerezo no guhana ubunararibonye
Umukozi wa PIASS ushinzwe gahunda y’amahoro, Floriane Niyungeko
Abatoni Jane wari uhagarariye umuryango ARCT-Ruhuka
Abahuriye muri iyo nama mpuzamahanga biyemeje kuyigira ngarukamwaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza