Nzindukiyimana Jérémie wo mu Mudugudu wa Gahanga mu Kagari ka Rugango, yagombaga gusezerana tariki ya 30 Nyakanga 2020, ageze ku Biro by’Umurenge wa Mbazi aza gutungurwa n’uko Umunyamabanga Nshingwabikorwa w’uwo murenge, Uwimabera Clémence, yanze kubasezeranya abashinja ko ari abicanyi.

Umuyobozi w’Akarere ka Huye, Sebutege Ange, yakurikiranye icyo kibazo ku wa 5 Kanama 2020 asanga abangiwe gusezerana barengana, yiyemeza kubafasha.

Icyo gihe yabwiye IGIHE ati “Uriya musore azahabwa serivisi, akaba azamenyesha umunsi yahisemo tukayimuha.”

Kuri uyu wa Gatanu, tariki ya 28 Kanama 2020 Meya Sebutege yasohoje isezerano maze asezeranya imbere y’amategeko Nzindukiyimana Jérémie n’umukunzi we Byukusenge Claudette.

Intandaro yo kwanga kubasezeranya ngo ni uko umusaza witwa Nyabyenda Yohani yari yazindukiye ku Murenge wa Mbazi agiye kurega ko yakubiswe biturutse ku mvururu zavutse hagati ya mushiki wa Nzindukiyimana n’umugabo we.

Uwo mugabo wa mushiki we ngo ni we wakubise Yohani bimuviramo uburwayi.

Nzindukiyimana avuga ko ubwo izo mvururu zabaga yahageze atabaye kimwe n’abandi ariko atigeze arwana.

Inkuru wasoma: Meya Sebutege yiyemeje gufasha umuryango Gitifu w’Umurenge yashinje ubwicanyi yanga kuwusezeranya

Meya Sebutege yabasezeranyirije mu Murenge wa Mbazi aho bagombaga gusezeranira mbere babyangirwa n'Umunyamabanga Nshingwabikorwa, Uwimabera Clémence

Nzindukiyimana Jérémie n’umukunzi we Byukusenge Claudette n'umugore we basezeranye imbere y'amategeko

Umuyobozi w'Akarere ka Huye, Sebutege Ange, yasohoje isezerano maze asezeranya imbere y’amategeko Nzindukiyimana Jérémie n’umukunzi we Byukusenge Claudette

Nzindukiyimana Jérémie n’umugore we Byukusenge Claudette mu ifoto y'urwibutso na Meya Sebutege Ange

[email protected]