I Rusizi na Rubavu harakorerwa umwitozo wo gukumira Ebola

Yanditswe na Evariste Nsengimana
Kuya 8 Mutarama 2019 saa 04:35
Yasuwe :
0 0

Minisiteri y’Ubuzima yatangaje ko igiye kongera gukora umwitozo wo kureba uko igihugu cyiteguye mu gukumira no kuvura icyorezo cya Ebola kiramutse kigaragaye mu Rwanda, ukazabera ku bitaro n’ibigo nderabuzima byo mu Turere twa Rusizi na Rubavu.

Ni nyuma y’aho ku wa 25 Ukwakira 2018, umwitozo nk’uyu wiswe ‘Kumira Ebola Simulation Exercise (SIMEX)’ ukorewe ku bitaro bya Gisirikare o Kanombe mu Mujyi wa Kigali n’undi wigeze kubera mu Mujyi wa Rubavu.

Itangazo iyi Minisiteri rivuga ko icyo gikorwa igifatanya n’ibitaro biherereye mu turere twa Rusizi na Rubavu n’abandi bafatanyabikorwa.

Risobanura ko uwo mwitozo wo ku rwego rw’igihugu, uzaba hagati yo ku wa 8-11 Mutarama 2019.

Ebola imaze iminsi yibasiye Repubulika Iharanira Demokarasi ya Congo ariko ntiragaragara mu Rwanda. Minisante ikomeza gukora imyitozo kugira ngo isuzume ubushobozi bw’inzego zitandukanye nyuma y’amahugurwa n’ubushobozi mu rwego rw’ibikoresho n’ubumenyi yatanze.

Mu karere ka Rusizi biteganyijwe ko umwitozo uzabera mu Mudugudu wa Cyunyu, Akagari ka Burunga, Umurenge wa Gihundwe, ku kigo nderabuzima no ku bitaro bya Gihundwe no ku kibuga cy’indege cya Kamembe mu gihe i Rubavu ari ku bitaro bya Gisenyi.

Uzasuzuma niba inzego zirimo Minisiteri y’Ubuzima, abakozi bo mu bitaro by’Akarere, Laboratwari n’izindi nzego kugeza ku mudugudu ziteguye neza kandi zifite ubushobozi buhagije mu guhangana n’icyo cyorezo kiramutse kigaragaye mu gihugu.

Ni umwitozo uhambaye ukorwamo ibitandukanye birimo uburyo bwo kumenyekanisha ugaragaweho ibimenyetso bya Virusi ya Ebola, uko bamutwara, uko bamuvura n’uko bamushyingura aramutse yitabye Imana.

Minisiteri y’Ubuzima isaba abanyarwanda n’abaturarwanda bose, cyane cyane abatuye mu duce umwitozo uzakorerwamo, kudakuka umutima igihe babonye umwitozo wo gukumira no guhangana n’icyorezo cya Ebola.

Utu turere uzaberamo ni tumwe mu duhana imbibe na Repubulika Iharanira Demokarasi ya Congo, Ebola imaze guhitana abasaga 300 ariko muri rusange ubukangurambaga bwo kuyirwanya bwakorewe mu Turere dukora ku mipaka y’iki gihugu na Uganda na dutatu tw’Umujyi wa Kigali, twegereye ikibuga cy’indege.

Mu bimenyetso bihita bigaragara ku uyirwaye ni uguhinda umuriro, gucika intege, kubabara mu ngingo, kubabara umutwe no mu muhogo, bishobora kugaragara nyuma y’iminsi 2 kugeza kuri 21 nyuma y’ubwandu.

Umwitozo waherukaga gukorerwa ku bitaro bya gisirikare i Kanombe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza