Iyi raporo igaragaza ko ibi birarane n’abararanyije kwishyura imisoro byakomeje kwiyongera cyane. Mu 2019/20 abararanyije ku kwishyura imisoro bari 21.940 mu 2020/21 bagera kuri 49.119.

Mu 2021/22 abararanyije ku kwishyura imisoro bari 106.424 mu 2022/23 bagera kuri 238.700 mu 2023/24 bari 301.580, mu gihe mu 2024/25 bari 374.175.

Ku bijyanye n’imisoro itarishyuwe mu 2019/20 byari ibirarane bya miliyari 354.7 Frw. Mu 2020/21 aya mafaranga yageze kuri miliyari 485,1 Frw.

Mu 2021/22 ibirarane by’imisoro bitishyuwe byari miliyari 525,8 Frw mu gihe mu 2022/23 ibirarane by’imisoro byari 690,6 Frw, mu 2023/24 ibi birarane byageze kuri miliyari 608,6 Frw naho mu 2024/25 byageze kuri miliyari 725,3 Frw.

Ibi birarane ni amafaranga menshi cyane. Ashobora kuvamo nka Stade Amahoro eshatu. Aya mafaranga yakubaka kaburimbo y’ibilometero 453 ikavugurura indi ireshya n’ibilometero birenga 40.

Ni ibintu byumvikana niba Umuhanda Gicumbi-Rukomo w’ibilometero 151 waratwaye miliyari 200 Frw, mu gihe kwagura no gusana Umuhanda Kigali-Muhanga w’ibilometero 46, byatwara miliyoni 120$, wabyumva neza.

Aya mafaranga kandi yakubaka ibitaro hafi icyenda bigezweho ku rwego rw’Ibitaro bya Kaminuza bya Kigali bizuzura bitwaye miliyari 85 Frw. Wibuke ko ibi bitaro biri mu bya mbere bigezweho mu gihugu.

Yakubaka amashuri arenga 120, yo ku rwego rwo hejuru ameze nk’uko irya Ntare Louisenlund School kuko iri shuri ryo mu Karere ka Bugesera ryuzuye ritwaye hafi miliyari 6 Frw n’ibindi bikorwaremezo.

RRA yashyizeho ingamba nyinshi zitandukanye zo gukusanya umusoro no gufasha abantu kwishyura ibirarane. Nk’ubu mu 2024 RRA yashyizeho amabwiriza mashya agena uburyo n’ibisabwa mu kwishyura ibirarane by’imisoro mu byiciro, akuraho avansi ya 10% n’ingwate byasabwaga kugira ngo usora abone amasezerano yemeza ibyiciro n’amafaranga azajya yishyura.

Aya mabwiriza ya Komiseri Mukuru nº 001/2024 yo ku wa 31/05/2024, ateganya ko usora ufite ibirarane by’umusoro akaba adafite ubushobozi bwo kubyishyura byose icyarimwe, ashobora kwemererwa kubyishyura mu byiciro bitarenze 12 mu mwaka.

Komiseri Mukuru wa RRA ashobora kongeraho ikindi gihe kidashobora kurenga amezi 24, iyo hari ibimenyetso by’uko usora afite ibibazo bikomeye by’ubukungu.

Amabwiriza yari asanzweho mbere yateganyaga ko abasora basabwaga kwishyura 10% by’ikirarane bafite, bagatanga n’ingwate bitewe n’umusoro bagomba kwishyura, uretse abafite munsi ya miliyoni 5 Frw. Ubu ibi byombi byakuweho mu mabwiriza mashya.

Mu 2024 kandi Guverinoma y’u Rwanda yemeje iteka rigamije gukuriraho ibihano abantu n’ibigo runaka bifite imisoro bitatanze, ariko bakaza kwemera kugaragaza ibyo birarane n’imyenda biturutse mu bushake bwabo, ibituma abantu batanga ibirarane neza.

Iri teka riha uburenganzira abasora igihe bumva hari umusoro batishyuye kuba bawushyikiriza Ikigo cy’Igihugu cy’Imisoro n’Amahoro kandi ntibahanwe nk’uko byari bisanzwe bigenda, ari na yo mpamvu wasangaga hari abatinya kwirega.

Icyakora nubwo bimeze uko imisoro u Rwanda rukusanya yakomeje kwiyongera kuko mu mwaka w’isoresha wa 2024/2025 cyakusanyije miliyari 3.079,8 Frw z’imisoro, yarenzeho 1,3% kuri miliyari 3.041,2 Frw cyateganyaga gukusanya.

Bifite ishingiro kuko nko mu 2024 Raporo y’Ikigo cy’Igihugu cy’Ibarurishamibare (NISR), igaragaza ko ibigo by’ubucuruzi byavutse mu myaka 10 ishize birenga ibihumbi 269, umubare munini muri byo ukaba iby’abikorera kuko byihariye 95.9% by’ibigo by’ubucuruzi byose byashinzwe.

Ikindi ni uko kugeza mu 2024/25 mu Rwanda hari ibigo 420.172 bisora. Ibigera kuri 355 biri mu cyiciro cy’ibinini, ibito ni 419.172, mu gihe ibiciriritse ari 766.

Kwiyongera mu mubare ni na ko byiyongera mu bunini, ni ukuvuga ikigo cyagutse kuko nko mu mwaka wa 2024 warangiye mu Rwanda hari ibigo by’ubucuruzi 2.290 byinjiza miliyari 1 Frw ku mwaka.

Ni umubare wikubye inshuro zirenze ebyiri mu myaka itanu, kuko mu 2020 byari 1.027. Mu 2024 ibi bigo byose byinjije miliyari 18.442,3 Frw.

Ibirarane by’imisoro abantu babereyemo RRA byageze kuri miliyari 725 Frw