Mu myaka itatu ishize Ibitaro by’Umwami Faisal ntibyigeze bibura ku rutonde rw’’ibigo bihombya Leta akayabo. Uyu mwaka nanone, ubuyobozi bw’ibi bitaro bwananiwe gusobanura iby’ikoreshwa ry’akayabo k’amafaranga angana na Miliyoni igihumbi na maganinani (Miliyari 1.8)

Imbere ya Komisiyo y’inteko ishinga Amategeko ishinzwe gukurikirana imikoreshereze y’imari n’umutungo bya Leta, Ubuyobozi bw’ibitaro byitiriwe umwami Faisal bwananiwe gusobanura akamaro ibikorwa byatanzweho amafaranga ya Leta miliyari 1,8, bifitiye Abanyarwanda.

Kimwe n’abandi bayobozi b’ibigo bititwaye neza, Kuri uyu wa kane tariki 9 Ukwakira 2014, Abayobozi b’ibitaro byitiriwe Umwami Faisal bitabye PAC ngo basobanure amakosa yagaragaye mu micungire y’umutungo wa Leta. Ntibashoboye na gato gusobanura inyungu igihugu gifite mu bikorwa ibi bitaro byashoyemo amafaranga akabakaba miliyari ebyiri.

Buri mwaka ibitaro byitiriwe Umwami Faycal bihombya Leta akayabo

Intandaro y’itangwa ry’aya mafaranga…

Amafaranga miliyari imwe na miliyoni 800 yagendeye mu mushinga witwaga “King Faisal Rehabilitation and Exapension” wari ugamije kwagura ibitaro waje guhagarara utarangiye, nyamara amafaranga yo yaramaze kwishyurwa abakoraga inyigo y’ahazubakwa (Design).

Nk’uko babigaragaje ubwo bisobanura, uyu mushinga waje guhagarikwa n’amafaranga y’ubwubatsi yagombaga gutangwa n’ikigega cy’Abarabu atarabonetse, mu gihe isoko ry’inyigo ryari ryarahawe ikompanyi y’Abanyamerika yitwa OZ, ndetse baramaze no kuyishyura miliyari 1,8 y’amafaranga.

Abadepite bagize PAC batunguwe bikomeye no kumva ibi bitaro byaratanze isoko ry’inyigo, nyamara bitizeye ahazava amafaranga yo gushyira mu bikorwa umushinga, PAC ibibonamo ubushishozi bucye bwateye igihombo gikomeye Leta. Depite Nkusi Juvenal ukuriye PAC yagaragaje ko bibabaje kuba abantu batakaza akayabo k’amafaranga y’abaturage asaga miliyari, igikorwa akoze ntikibagirire akamaro.

Depite Nkusi asigaye yumirwa umunsi ku wundi, iyo yumva abisobanura ibidashoboka

PAC ibajije akamaro aya mafaranga bishyuye yagiriye Abanyarwanda, buri wese mu bagize itsinda ry’abayobozi b’ibitaro bari bitabye ntiyorohewe no gusubiza, Depite Nkusi ahitamo kukibaza Umuyobozi mukuru ushinzwe umutungo Jotham Tumwine, ari nawe wasinyaga ku mafaranga yasohotse.

Depite Nkusi yagize ati “Ibyo wakoze igihugu cyavanyemo nyungu ki?”. “ Ndagira ngo nkubaze wowe Chief Finance Officer w’ibitaro bya Faisal….ubu ngubu iyo ubonye aho bigeze uravuga iti u Rwanda rwarungutse?” Mu buryo bugaragara ko bumugoye, Tumwine yasubije ko uretse inyigo nta wundi mumaro igikorwa cyatwaye aya mafaranga cyamariye Abanyarwanda ati “Rwose ntabwo nababeshya[…]”

Abahagarariye Ibitaro bya Faisal bariye amagambo imbere ya Komisiyo 'PAC'

Uretse kuba haratanzwe isoko ry’inyigo itarabashije kugira icyo imara, PAC yanenze kandi uburyo ikiguzi cyahawe uwatsindiye isoko ari kinini cyane ugereranije n’akazi kagombaga gukorwa. PAC yasabye ibitaro bya Faisal kujya bikemura ibibazo hakiri kare, bitaragera ku rwego babibazwa bakabura ibisubizo.

Faisal isubiramo amakosa amwe uko umwaka utashye, bikarangirira gusa mu kubazwa

Mu bindi bibazo byabajijwe abayobozi b’ibitaro bya Faisal harimo ibijyanye no kuba hari imyenda batishyuwe n’iyo batishyuye ndetse banasabwa ibisobanuro ku gihombo cya miliyoni 340 yahombeye mu miti baranguye bakayigurisha na CAMERWA ikayigurisha ku giciro gito. Ibi bije bikurikira amakosa asa n’aya neza neza, kuko mu mwaka w’2011/2012, Umugenzuzi w’imari ya Leta yatangaje ko miliyoni 548 z’amafaranga y’u Rwanda zahombejwe n’ibitaro byitiriwe Umwami Fayçal bifatanyije n’ikigo kibika imiti cya CAMERWA kubera imiti byabitse ikarenza igihe.

Mu mwaka w’2011/2012, abayobozi b’ibitaro basabiye aya makosa imbabazi bavuga ko bitazasubira, mu mwaka wakurikiyeho 2012/2013 basubiramo aya makosa na none ku bufatanye bufifitse bagirana na CAMERWA, bagahombera hamwe, bikarangira ibitaro bya Faisal aribyo byitabye kwisobanura.

Akajagari mu buyobozi n’imikoranire y’inzego z’ibitaro

Ikibazo cy’imiyoborere muri ibi bitaro aho abenshi mu bakozi bakora nk’abasigire bikaba byatuma badakora akazi uko bikwiye, nabyo PAC yabiketsemo kuba byaba intandaro yo kutita ku nshingano, ariko ubuyobozi bw’ibitaro bugaragaza ko bugerageza kubyitwaramo neza.

Kimwe rukumbi Komisiyo y’Inteko Ishinga Amategeko ishinzwe kugenzura ikoreshwa ry’Umutungo wa Leta ( PAC) yashimiye Ibitaro byitiriwe Umwami Faisal, ni ukuba hamwe na hamwe byaravuguruye imikorere ku buryo butanga icyizere mu bihe biri imbere, ariko nabyo biracyahanzwe amaso.