Umuryango uharanira inyungu z’abacitse ku icumu rya Jenoside yakorewe Abatutsi ‘IBUKA’, uramagana imanza z’urudaca zaciwe n’Inkiko Gacaca zirimo kujuririrwa hirya no hino mu nkiko z’igihugu.

Nkuko Umuyobozi Mukuru wa IBUKA Prof. Dusingizemungu Jean Pierre yabitangaje ubwo hibukwaga Abatutsi bazize jenoside bakajugunywa mu mazi, mu muhango wabereye mu mu Murenge wa Rukumberi Akarere ka Ngoma, yasabye Abanyarwanda n’amahanga gukomeza kwamaganira kure abagifite umugambi wo gupfobya Jenoside yakorewe Abatutsi.

Prof. Dusingizemungu yasabye abantu bose gutangira kwamagana abantu basigaye birirwa mu nkiko basaba ko imanza zaciwe n’inkiko Gacaca zasubirwamo.

Yagize ati “ Iki ni ikintu kibabaje abantu bose bakwiriye kurwanya bivuye inyuma. Abanyarwanda bataye umwanya munini bashaka uburyo imanza zacibwa, ntabwo bikwiriye ko abantu basubira muri muzunga y’Inkiko Gacaca hasubirwamo imanza zari zaraciwe. Hakwiriye kujyaho icyemezo politiki kugira ngo iki kibazo kiremereye gikemuke.”

Prof. Dusingizemungu yakomeje avuga ko urebye ibikorwa bibera hirya no hino mu gihugu nyuma y’inkiko Gacaca, hari igihe kizagera bikavugwa y’uko nta n’Abatutsi bapfuye.

Umuvugizi w’inkiko z’u Rwanda Kariwabo Charles, aganira na IGIHE yavuze ko impungenge z’Umuryango IBUKA zifite ishingiro, ati “Ukurikije ibyavuye mu Nkiko Gacaca kumva imanza ibihumbi magana bigarutse mu nkiko byaba bigaragaye ko ntacyo Inkiko Gacaca zagezeho, ikindi ubujurire bw’abakatiwe n’Inkiko Gacaca baramutse basubiye mu nkiko bose bajurira, bitinza cyane ishyirwa mu bikorwa imyanzuro y’Inkiko Gacaca.”

Kariwabo Akomeza agira ati “Inama nagira abashaka gutanga ubujurire mu nkiko ku manza zaciwe nIinkiko Gacaca, bazajye babanza basome itegeko bamenye abatanga ubujurire ku manza zarangijwe n’Inkiko Gacaca abo aribo.”

Kujurira ku manza zaciwe n’Inkiko Gacaca byatangiye ubwo itegeko rizikuraho ryasohokaga.

Ingingo ya 9 y’iri tegeko igaragaza ko urubanza rwaciwe n’Urukiko Gacaca rushobora kujuririrwa igihe umuntu wakatiwe yari mu mahanga, iki gihe ashobora kuba yasubirishamo urubanza rwaciwe n’Inkiko Gacaca.

Iyi ngingo igira iti “Isubirishamo ry’urubanza rwaciwe n’Urukiko Gacaca uregwa atari mu gihugu. Iyo umuntu yarezwe, akaburanishwa n’Urukiko Gacaca, agahamwa n’icyaha ari mu mahanga, agarutse kandi bikaba bigaragara ko atari yaratorotse ubutabera, ashobora gusubirishamo urubanza rwaciwe adahari mu rukiko rufite ububasha bwo kuburanisha icyo cyaha, nk’uko biteganywa n’iri Tegeko Ngenga”.