Imiryango iharanira inyungu z’abarokotse jenoside mu Rwanda yasohoye itangazo ryamaganira kure filimi ‘Rwanda: The Untold Story’ yakozwe na BBC. Iyi miryango ivuga ko iyi filimi igamije gupfobya.

Mu ibaruwa ifunguye yashyizweho umukono na Dr Jean Pierre Dusingizemungu uyobora Ibuka, Yvonne Kabanyana uyobora AVEGA, Jean de Dieu Mirindi uyobora AERG na Charles Habonimana uyobora GAERG bandikiye Tony Hall, Umuyobozi Mukuru wa Televiziyo mpuzamahanga y’Abongereza ya BBC bamubwira ko batonetswe bikomeye n’iyi filimi yerekanywe kuri BBC2 mu cyumweru gishize.

Iyi filimi ‘Rwanda: The Untold Story’ yayobowe na John Conroy ikorwa n’umunyamakuru w’Umwongerezakazi witwa Jane Corbin.

Iyi filimi bigaragara ko yakozwe hari ikigamijwe, ivuga ko Perezida Kagame na FPR ari bo barashe indege ya Habyarimana, kandi ko bafite uruhare rugaragara muri jenoside yakorewe Abatutsi. Igaragaramo ubuhamya bw’abantu bari mu buhungiro, Abanyamerika bakoze ubushakashatsi ku ihanurwa ry’indege ya Habyarimana n’abandi benshi batunga urutoki Leta y’u Rwanda mu iyicwa ry’abantu.

Dr Dusingizemungu Jean Pierre uhagarariye Umuryango wa Ibuka

Igitangaje kandi gikomeye cyane cyane mu rwego rw’itangazamakuru ni uko muri iyi filimi hatagaragamo abahagarariye u Rwanda, ngo bagire icyo bavuga ku birego umuntu atabura kwita ibyo kuyobya uburari, ahubwo hagahabwa urubuga abandi bafitiye urwango u Rwanda mu buryo bumwe cyangwa ubundi nka Kayumba Nyamwasa, Dr Rudasingwa Theogene n’abandi.

Muri iyi filimi ntihanengwa iterambere u Rwanda rugezeho n’urugero rwiza rutangwa ku mahanga, ahubwo herekanwa ko n’ubwo ibi byagezweho hakiri ibitagenda neza.

Iyi miryango iharanira inyungu z’abarokotse ivuga ko iri ari ihakana ryeruye rya jenoside yakorewe Abatutsi mu 1994, igasaba BBC ko yahita ihagarika iyerekanwa ryose ry’iyi filimi.

Muri iyi baruwa Ibuka igira iti “Iyo filimi ni ibinyoma byambaye ubusa, kandi isa n’igamije kongera gutoneka ibikomere byacu. Ni mu buryo bugoye kwemera kandi bubabaje abantu bake bafite ibyo batemeranyaho na Leta bihaye guhindura jenoside bakayigira urubuga rwa politiki kandi bahakana ubwicanyi bwateguwe bukica miliyoni irenga y’Abanyarwanda. Ibi birasebya izina rya BBC mu kutabogama”.

Ibuka ivuga ko ishenguwe cyane no kwibaza ishusho abazamenyera bwa mbere amateka ya jenoside yakorewe Abatutsi muri ‘iyi filimi yakinanywe gupfobya n’ibinyoma’.

Ibuka igira iti “Mukoresheje iyi filimi, mwanize amajwi y’abacitse ku icumu, mutiza umurindi abifuza gupfobya iyi jenoside yateguwe ikaba no mu zahitanye mu gahe gato imbaga y’abantu mu kinyejana cya 20. Turasaba BBC kurengera amahame ngenderwaho y’umwuga w’itangazamakuru.”

[email protected]