Ibyiciro by’ubudehe, ibiciro by’ibiribwa, umusoro w’ubutaka-Ibyo abanyarwanda bifuza mu Umushyikirano

Yanditswe na Evariste Nsengimana
Kuya 14 Ukuboza 2019 saa 01:14
Yasuwe :
0 0

Imyiteguro y’Inama y’Igihugu y’Umushyikirano igiye kuba ku nshuro ya 17 irarimbanyije, aho kuwa 19 na 20 Ukuboza 2019, abanyarwanda bari imbere mu gihugu, ababa mu mahanga n’inshuti zabo, bazakoranira muri Kigali Convention Centre, bakungurana ibitekerezo ku buzima rusange bw’igihugu.

Ni inama ireba uko ubuzima rusange bw’igihugu buhagaze, hatangwa inama n’ibitekerezo, hagafatwa n’imyanzuro igomba gushyirwa mu bikorwa kugira ngo ibitameze neza binozwe.

Abanyarwanda batangiye kwiyandikisha basaba kuzawitabira. Nk’ababa muri Canada, Ambasade y’u Rwanda muri iki gihugu yabahaye ubutumire ku wa 19 Ugushyingo ibasaba gutangira kwiyandikisha niba bifuza kuzitabira iyi nama muri KCC, bakabikora bitarenze ku wa 25 Ugushyingo.

Abaturage bawitezeho iki?

Bamwe mu baturage batanze ibitekerezo mu kiganiro isesenguramakuru cyatambutse kuri RBA kuri uyu wa Gatandatu, bavuze ko baramutse bagize amahirwe yo kuwitabira bazasaba ko hagira igikorwa ku ngingo zibangamiye abaturage zirimo ibyiciro by’ubudehe, umusoro w’ubutaka, impinduka mu burezi n’ibindi bigahabwa umurongo uhamye.

Ibyiciro by’ubudehe ni kimwe mu bibazo byakunze gutungwa agatoki ko bidakoranwa ubushishozi, bikagira ingaruka ku mibereho ya bamwe, cyane cyane muri gahunda zo gukura abaturage mu bukene.

Gusa Minisiteri y’Ubutegetsi bw’igihugu iheruka gutangaza ko yatangiye urugendo rwo kubivugurura mu buryo buri wese azajya mu cyiciro kimukwiye ariko anateganya uburyo bwo kukivamo akajya mu yisumbuye mu gihe runaka.

Uwitwa Ruhumuriza yavuze ko hakwiye gusuzuma uburyo bwo kunononsora ibyiciro by’ubudehe n’ikibazo cy’abitwaza ubuhanuzi bagamije ubutekamutwe.

Uwitwa Ganza Ndayizeye yavuze ko aramutse ahawe amahirwe yo kwitabira iyi nama, yasaba ko haganirwa ku guca ubusumbane hagati y’abaturage kuko kibangamiye iterambere ry’abaturage.

Umusoro w’ubutaka uri mu bibazo abaturage bakomeje kugaragaza ko hari aho ubangamye ndetse mu minsi ishize umunyamategeko, Murangwa Edouard aheruka kuwuregera mu rukiko rw’Ikirenga asaba ko ingingo zimwe z’itegeko riwereke zakurwa.

Rwanzuye ko ingingo ya 19 y’itegeko rigena inkomoko y’imari n’umutungo by’inzego z’imitegekere y’Igihugu zegerejwe abaturage ivuga ku gipimo cy’umusoro utangwa ku butaka burenga ku bipimo fatizo by’ikibanza, iteshwa agaciro kuko inyuranyije n’Itegeko Nshinga.

Uwitwa Niyigena Phillipe yagize ati “Natanga igitekerezo cyo gukuraho umusoro w’ubutaka kuko urabangambye cyane.”

Ikigo cy’igihugu cy’Ibarurishamibare mu Rwanda, NISR, giheruka gutangaza ko ibiciro ku masoko mu kwezi gushize byazamutseho 6.9 ku ijana, bivuye kuri 4.4 ku ijana yabarurwaga mu Ukwakira 2019. Ibiciro by’ibiribwa n’ibinyobwa bidasembuye byazamutseho 16.2 ku ijana ugereranyije n’igihe nk’icyo mu mwaka ushize, na 3.7 ku ijana ugereranyije n’ukwezi kwabanje.

Ndatimana Francis wo mu Karere ka Gatsibo yagize ati “Najyanayo igitekerezo cyo kumanura ibiciro by’ibiribwa n’ibinyobwa kuko byarazamutse cyane.”

Mu zindi ngingo zagarutsweho hari imikorere y’urwego rw’uburezi rukunze gukorwamo impinduka za hato na hato, abaturage bakinuba ko zigira ingaruka ku banyeshyuri, ababarera n’ireme ry’uburezi muri rusange. Iki kijyanye n’icyatanzwe cyo kuzamura imibere ya mwarimu.

Hari kandi gahunda zo kuzamura iterambere ku bagore, gukumira inda ziterwa abangavu, guteza imbere ibikorwa remezo no kurenganura abanyamuryango bo mu rugaga rw’abakora imirimo ishamikiye ku buvuzi bacibwa ibihumbi 50Frw kugira ngo barugemo kandi batarabona akazi.

Hari kandi ikibazo cy’amacumbi, aho abatanze ibitekerezo bagaragaje ko batewe impungenge n’uburyo cyera umuntu yagiraga imyaka 20 afite inzu ye ariko muri iki gihe umuntu akaba asigaye asazira mu bukode.

Abasesenguzi babibona gute?

Umunyamakuru, Umuhire Valentin, yavuze ko nk’ikibazo cy’izamuka ry’ibiribwa ari ikibazo gikwiriye gusuzumwa byimbitse kuko gikomeje guteza ibibazo hirya no hino mu baturage.

Ati “Ni ikibazo bakwiye kwicara bakareba ikigitera n’umurongo byahabwa.”

Mukasonga Solange ukora mu mushinga Ejo Heza, yavuze ko iyi nama y’umushyikirano ikwiye kuzanoza imikoresheze y’ibyiciro by’ubudehe kuko ariyo ishobora gutuma abantu babyinubira cyangwa bakabyishimira, n’urubyiruko rugakurwa ku byiciro by’ubudehe by’ababyeyi barwo.

Ati “Bakwiye gutekereza ko wenda bishobotse hazaba n’umunsi wihariye wo kwiga ku burezi.”

Umuyobozi wungirije w’Umuryango Never Again Rwanda, ushinzwe imiyoborere, uburenganzira n’imishinga yihariye Mahoro Eric, yavuze ko iyi nama “Izaba yagenze neza nisubiza ibibazo bijyanye n’imibereho myiza y’abaturage bigakemuka, iby’uburezi bikongera bikagarukwaho. Nifuza ko n’urubyiruko rugarukwaho cyane, bikajyana no guha uruhare abaturage mu bibakorerwa no kunoza imitangire ya serivisi.”

Umuhire Valentin yagize ati “Izaba yageze neza ari uko hafashwe ingamba ku bibazo byagaragajwe n’abaturage kuko nibo shingiro ry’iterambere ry’abaturage.”

Inama y’igihugu y’Umushyikirano iteganywa mu ngingo ya 140 y’Itegeko Nshinga rya Repubulika y’u Rwanda ryo mu 2003 ryavuguruwe mu 2015, igahuza Perezida wa Repubulika n’abahagarariye abaturage.

Itegeko Nshinga riteganya ko “Inama y’Igihugu y’Umushyikirano iterana nibura rimwe mu mwaka igasuzuma uko ubuzima bw’igihugu n’ubumwe bw’Abanyarwanda buhagaze. Perezida wa Repubulika atumiza kandi akayobora Inama y’Igihugu y’Umushyikirano akanagena abayitabira.

Abaturage barifuza ko ibyiciro by'ubudehe n'ibiciro by'ibiribwa byaganirwaho mu Umushyikirano

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza