Imishinga ihatana ikubiye mu byiciro bine birimo ubuhinzi n’ubworozi no gutunganya umusaruro ubikomokaho, ikoranabuhanga, ibikorerwa mu nganda (manufacturing) n’izindi serivisi.

Amarushanwa yatangiriye ku rwego rw’Akarere, aho hagombaga kukomeza imishinga ine ku rwego rw’Intara n’Umujyi wa Kigali muri buri cyiciro, hiyongereyeho umugore n’ufite ubumuga wahize abandi.

Kuri uyu wa Gatatu tariki ya 30 Ugushyingo 2022, hahatanye imishinga yahize indi ku Rwego rw’uturere tugize Umujyi wa Kigali, aho imishinga ine yahize indi, buri umwe wahawe miliyoni 1 Frw.

Ni imishinga igaragaza amahirwe yo gukemura ibibazo sosiyete ihura nabyo binyuze mu dushya ba rwiyemezamirimo bibandaho mu kuyishyira mu bikorwa.

Smart Class Ltd

Mu cyiciro cy’ikoranabuhanga, umushinga Smart Class Ltd ni wo wahize indi.

Ni umushinga ugamije guhuza abana bo mu gihugu bose baba abo mu cyaro n’abo mu mujyi, bakajyanirana ku masomo bagezeho.

Smart Class ni uburyo abanyeshuri bo mu mwaka umwe bashobora guhurira kuri urwo rubuga bagasangira ubumenyi, mu gihe umwalimu watoranyijwe aba ari kwigisha agendeye ku mfashanyigisho zateganyijwe.

Abarimu bigisha buri mugoroba kuva saa 18h00 kugera saa tatu, bigafasha umwana gusubiramo amasomo mu gihe yaba atakurikiranye neza ku manywa.

Muri ubwo buryo, kuri urwo rubuga hashyirwaho amasomo mu buryo bw’amashusho atarengeje iminota irindwi, ku buryo mwalimu asubiramo isomo ryizwe uwo munsi, bityo bikabera umunyeshuri amahirwe yo kuyacengera neza.

Kugeza ubu abasaga 10,000 batangiye gukoresha ubu buryo. Hashyizweho uburyo bugaragaza uko abanyeshuri bitabira n’uburyo bakurikirana ko mwalimu ari kwigisha.

Abdul Niyonizeye watangije uyu mushinga yagize ati "Ubu dufite itsinda ry’abantu batandatu bakora ku buryo buhoraho ndetse tumaze gukorana n’abarimu barenga 128 bakora ku buryo bw’ibiraka. Twibanda ku guha akazi urubyiruko."

Ni gahunda yatangije nyuma yo kubona ko ibigo bitandukanye mu bushobozi bwo kwigisha, aho umwana ashobora kwiga ahantu akadindira atari uko ari umuswa, ahubwo ari ukubera uburyo yigishwamo.

Smart Class yitezweho gufasha abana kugendera hamwe, ntawe usigaye.

Alifarms Group Ltd

Mu cyiciro cyo guteza imbere ubuhinzi n’ibibukomokaho, Alifarms Group Ltd ni yo yahize indi mishinga.

Aba bakora ubuhinzi bw’imbuto n’imboga hatifashishijwe ubutaka, ahubwo hifashijishwe amazi.

Iki kigo cyashinzwe na Iraguha Marie Aline, gikora ubuhinzi bukoresha amazi ku kigero cya 90%, uburyo buzwi nka ’Hydroponics’ bushobora gutanga umusaruro wikubye inshuro kuva kuri 3-10 ugereranije n’ubuhinzi busanzwe, ku buso bungana.

Bafata ifumbire bakayiyungurura yaba iy’imborera n’imvaruganda, bikavangwa, akaba ari yo bakoresha. Imboga ziba ziteye mu duhombo ku buryo bw’impagarike, ubundi imboga zigakura.

Iraguha avuga ko afite abamufasha babyize ndetse na we yabihuguriwe muri Leta zunze Ubumwe za Amerika, akaba yizeye ko umusaruro uzaboneka ku buryo buhoraho.

Kugeza ubu afite abakozi batandatu barimo babiri bakora ku buryo bw’ibiraka.

Umusaruro wa mbere wahawe abakiliya babo b’imena nk’igerageza, ubu bakaba bitegura kugemurira amahoteli atandukanye.

Ni igitekerezo Iraguha yagize mu 2017 ubwo yavaga iwabo agiye kuba mu Mujyi wa Kigali, hanyuma akabura uko yakwiharika imboga n’imbuto aho atuye, bituma yiyemeza ku bikora mu buryo bugezweho budakenera ubutaka.

Ati "Ntaraza i Kigali nakundaga gutera imboga, ibintu byangoye cyane ubwo nazaga i Kigali ariko ndahatana nkora ubushakashatsi bw’ukuntu nabona imboga kandi ntifashishije ubutaka."

“Byose ni Bamboo Ltd”

Byose ni Bamboo Ltd ni ikigo kibyaza umusaruro igihingwa cy’umugano, aho gikorwamo ibikoresho bitandukanye byaba intebe, ameza, utubati n’ibindi byo mu nzu bitandukanye.

Bagitangira bakuraga imigano i Musanze, ariko uko ubucuruzi bwaguka bahise bashaka uko bakwihingira iyabo kugira ngo bakore ibicuruzwa byinshi.

Muri Byose ni Bamboo Ltd bafite abakozi batandatu bahoraho n’abandi 15 bakora nk’ikiraka.

Kugeza ubu bafite abanyeshuri icyenda bigisha.

Uwera Vestine ajya gutangiza iki kigo, yabitewe n’uburyo u Rwanda ruri kugabanya ibikoresho bikozwe muri pulasitiki mu kurengera ibidukikije, bityo ashaka inzira yatuma ibidukikije bibungwabungwa kandi abantu bakabona ibikoresho bakeneye.

Ati "Ubu turi no mu rugamba rwo kurwanya ibikoresho bikozwe muri pulasitiki, yego mfite abo mpanganye nabo muri iki gisata ariko bibaye byiza twese tukarwanya ibi bikoresho byangiza ibidukikije, twaba tugeze ku ntego."

Arts and Fashion House

Arts and Fashion House ni ikigo cyiyemeje gukora imyenda yambarwa n’urubyiruko, ariko ikorewe mu Rwanda.

Imyenda ikorwa ku buryo igenewe urubyiruko rufite imyaka kuva 16-35.

Niyonsaba Pascal na mugenzi we bafata igitambaro runaka bakagitera amarangi ku buryo bw’ubugeni, bagakuramo imipira n’amapantalo agurwa n’abantu batandukanye bashaka kurimba.

Niyonsaba ati "Imyenda ya Made in Rwanda ahanini iba igizwe n’amashati yo mu biro, ukabona ko urubyiruko rwinshi rutabona imyenda rushaka, mbese rutisanga muri iriya isanzwe. Dutangira umushinga dutyo."

Biyemeje kuzana imyenda idasanzwe mu Rwanda, ariko ikaba igenewe urubyiruko ndetse ikanakoreshwa n’ibyamamare bitandukanye, maze amafaranga yajyanwaga hanze gushaka iyo imyenda, akaguma mu gihugu.

Bafite abadozi babiri n’abamurika imideri batanu, bakaba bakora imyenda bakayigurisha, yashira bagakora indi itandukanye n’iyambere, ku buryo kugeza ubu bafite ababagurira bo mu bihugu 21 birimo 15 bya Afurika na bitanu byo hanze yayo.

Uwemererwaga kwitabira amarushanwa yagombaga kuba ari umunyarwanda uri hagati y’imyaka 16 na 30, kuba afite umushinga umaze nibura amezi atandatu ukora, kuba ushobora kwaguka kandi utanga akazi ku bantu benshi, no kuba atarahembwe mu bantu bane ba mbere mu myaka yabanje.

Abahize abandi mu byiciro bine bitandukanye buri muntu yahembwe miliyoni 1 Frw, bakaba bazahatanira igihembo nyamukuru cya miliyoni 25 Frw.

Minisiteri y’Urubyiruko n’umuco itegura aya marushanwa ku bufatanye n’Ishami ry’Umuryango w’Abibumbye rishinzwe Iterambere, UNDP n’Ikigo mpuzamahanga cya Korea gishinzwe ubutwererane, KOICA, binyuze muri porogaramu ya YouthConnekt.

Umuyobozi ushinzwe umuco muri Minisiteri y'urubyiruko n'umuco, Twahirwa Aimable, ashyikiriza igihembo Niyonsaba Pascal washinze Smart Class

Uwera Vestine yavumbuye ibanga mu migano

Niyonsaba washinze Arts and Fashion House yiyemeje gukora imyenda igenewe urubyiruko

Iraguha yavuze ko intego ari ukwegukana igihembo nyamukuru cya miliyoni 25 Frw

Iraguha Marie Aline washinze Alifarms yahembwe nk'uwahize abandi mu cyiciro cyo guteza imbere ubuhinzi n'ibibukomokaho

Mu gutoranya umushinga wahize indi, abagize akanama nkemurampaka bibandaga ku gashya umushinga uzanye, icyo uzamarira sosiyete n'abo uha akazi

Aya marushanwa yitabiriwe n'urubyiruko rutandukanye rwihangiye imirimo

Amafoto: Jules Sendegeya