Ifite inzu izagurishwa miliyari 1 Frw: Ubwiza bw’inyubako ‘Royal Golf View Apartment Hotel’ iri kuzamurwa i Kigali

00:00:00 IGIHE NETWORK

KINYARWANDA

ENGLISH

FRANCAIS

Ifite inzu izagurishwa miliyari 1 Frw: Ubwiza bw’inyubako ‘Royal Golf View Apartment Hotel’ iri kuzamurwa i Kigali

Yanditswe na Igizeneza Jean Désiré

Kuya 27 June 2025 saa 07:41

Yasuwe :

Yavuzweho:

Imirimo yo kubaka Royal Golf View Apartment Hotel iherereye ku Kacyiru mu Karere ka Gasabo izaba igeretse inshuro 10 irarimbanyije.

Yatangiye kubakwa muri Gicurasi 2024. Izaba ifite ‘apartment’ zo guturamo zirenga 50 zifite ibyumba bitandukanye kuva kuri kimwe n’uruganiriro, bibiri, bitatu na bitanu.

Iherereye hafi y’agace karimo ibikorwa bifasha umuntu kubona serivisi zitandukanye. Ni ho hari Chillax Lounge Nyarutarama, Ibitaro Byitiriwe Umwami Faisal, za ambasade zitandukanye, ibiro bikoreramo inzego za leta na za minisiteri, Ikibuga cya Golf cya Kigali, inyubako nka Kigali Heights, Radisson Blu Hotel & Convention Centre n’ibindi.

Royal Golf View Apartment Hotel izaba ifite n’inyubako yahariwe ubucuruzi, ifite za ‘restaurants’, apartments 60 n’ibindi bice byo kwidagaduriramo no gukora imyitozo ngororamubiri. Biteganyijwe ko izuzura muri Kamena 2026.

Muri ‘apartments’ z’amoko atanu ifite, harimo izifite icyumba kimwe, buri imwe iri ku buso bwa metero kare 96. Zizaba zifite igikoni n’uruganiriro, ubwogero n’ubwiherero, ibaraza n’ibindi.

Zizaba ziherereye mu igorofa ribanza (ground floor) kugeza ku igorofa rya kane. Ushaka izo ‘apartments’ yishyura ibuhumbi 144$ ku ziri mu igorofa ribanza, irya mbere n’irya kabiri. Iziri mu igorofa rya gatatu kugeza ku ya kane uzishaka yishyura ibihumbi 148.800$.

Royal Golf View Apartment Hotel kandi yateganyije ‘apartments’ 30 zifite ibyumba bibiri n’uruganiriro na zo zigurishwa. Zizaba ziri ku buso bwa metero kare 130 na metero kare 140.

Buri imwe iri ku buso bwa meterokare 130, ifite ibyumba bibiri, buri cyumba gifite ubwogero n’ubwiherero byacyo. Ifite n’ibaraza. Ushaka izo ‘apartments’ yishyura ibihumbi 195$ ku ziherereye mu igorofa ribanza, irya mbere n’irya kabiri, mu gihe uwifuza ‘apartments’ ziherereye mu igorofa rya gatatu n’irya kane yishyura 201.500$.

Hazaba harimo kandi ‘apartments’ z’ibyumba bibiri buri imwe iri ku buso bwa meterokare 140. Buri cyumba kizaba gifite ubwiherero, ubwogero bitandukanye, ikagira uruganiriro ndetse n’ibaraza rigezweho.

Ushaka izo ‘apartments’ ziherereye mu igorofa ribanza, irya mbere cyangwa irya kabiri yishyura 246.400$. Mu gihe ushaka iziherereye mu igorofa rya gatatu n’irya kane yishyura 254.100$.

Hari kandi ‘apartments’ eshanu buri imwe ifite ibyumba bitatu, ziherereye mu igorofa ribanza kugeza ku rya kane. Ziri ku buso bwa metero kare 175.

Ni ‘apartments’ na zo zifite ibyumba bitandukanye n’ibijyana na byo ni ukuvuga, ubwiherero, ubwogero n’ibindi, zikagira uruganiriro n’ibaraza rifasha umuntu kumva amahumbezi yo muri icyo gice.

Iziherereye mu magorofa abanza kugeza ku ya kabiri, zishyurwa ibihumbi 308$ mu gihe iziherereye mu igorofa rya gatatu n’irya kane buri imwe igurishwa 317.625$.

Royal Golf View Apartment Hotel ifite izindi ‘apartments’ enye zizwi nka ‘Penthouses’ ziherereye ku gasongero k’inyubako yose.

Ziri ku buso bwa metero kare 400, imwe ifite ibyumba bitanu. Zizaba ziherereye mu igorofa rya gatanu n’iya gatandatu. Ushaka imwe atanga ibihumbi 748$ (arenga miliyari 1 Frw).

Buri cyumba muri ibyo bitanu gifite ubwogero n’ubwiherero, n’ibindi bigezweho. Gifite amabaraza afasha uwaguze inzu kuryoherwa n’ubwiza bw’Umujyi wa Kigali. Iyi ’apartment’ yagenewe kandi ibiro.

Royal Golf View Apartment Hotel yagenewe igice cyahariwe ubucuruzi ku buryo abazaba muri izo ‘apartments’ bashobora guhahira ibintu bitandukanye. Yagenewe parikingi zifite ubushobozi bwo kwakira imodoka zirenga 100.

Abashaka kwishyura na bo baroroherejwe, basabwa ko bakwishyura mu byiciro, aho nka 30% by’ikiguzi cya ‘apartment’ umuntu yahisemo yagombaga kucyishyura imirimo yo kubaka igitangira, 30% yindi ikishyurwa bitarenze muri Nzeri 2025.

Andi mafaranga angana na 30% ushaka imwe muri izo nzu azayishyura bitarenze muri Mutarama 2026, mu gihe igice cya nyuma kingana na 10% kizishyurwa Royal Golf View Apartment Hotel yamuritswe ku mugaragaro muri Kamena 2026.

Royal Golf View Apartment Hotel iri kubakwa na DND Triangle Real Estate Developers Ltd, ikigo cyashinzwe mu 2015, kigamije gufasha abashaka gutura mu Mujyi wa Kigali kubona inzu byoroshye.

Royal Golf View Apartment Hotel ni umushinga wa BWH Hotels, ikigo gikomeye gifite icyicaro gikuru i Phoenix muri Leta ya Arizona muri Amerika. Kigenzurwa na Best Western International, Inc.

BWH Hotel ibarirwa hotel zirenga 4700 mu bihugu birenga 100. Ifite hoteli igenzura zirenga 2000 zo muri Amerika y’Amajyaruguru. Ni ikigo cyashinzwe mu 1946 na Maurice K. Guertin.

Uko inzu izaba imeze